Италијанската поп-ѕвезда, добитничка на „Греми“ – Лаура Паузини, Алесандро Кателан и либанско-британската поп-ѕвезда Мика ќе бидат домаќини на претстојното 66. издание на Изборот на песна на Евровизија 2022 година во Торино, Италија, на 10 и 12 мај, како и на големото финале во сабота, на 14 мај.

Торино ја доби таа чест и ги победи Милано и Рим кои беа во трката за град домаќин на фестивалот, кој и понатаму предизвикува огромен интерес. Ќе се натпреваруваат 41 земја, а Евровизија 2022 ќе се одржи во грандиозната „Пале Олимпико арена“ во Торино. Овие тројца водители имаат зад себе големо медиумско искуство и голем успех кај публиката, така што нивното присуство ќе биде навистина посебен момент.

Кои се водителите на Евровизија 2022?

Лаура е добитничка на наградата „Греми“ за „Escucha“ во 2006 година, во категоријата за најдобар латино поп-албум, еден од 13-те студиски албуми, со повеќе од 70 милиони продадени копии ширум светот. Во 2020 година, таа соработуваше со Дајан Ворен за песната номинирана за „Оскар“, а за потребите на филмот„The Life Ahead“ во кој главната ѕвезда е славната Софија Лорен. Нејзиниот хит „La Solitudine“ e еден од најпознатите италијански песни кој доживеа светска популарност.

Алесандро е искусен ТВ-водител, кој девет години го водеше италијанското ТВ- шоу за таленти „The X Factor“, вклучувајќи го и изданието од 2017 година, кога победи хард-рок групата “Måneskin“. Всушност, оваа група минатата година победи и на фестивалот „Санремо“, а нешто подоцна и на Песна на Евровизија, поради што Италија е сега земја домаќин.

Мика се прослави по објавувањето на својот деби-албум „Life in Cartoon Motion“ во 2007 година, кој се продаде во скоро 6 милиони копии ширум светот и доведе до тоа да ја освои наградата „Брит“ за најдобар британски деби-поп. Неговите хитови се „Grace Kelly”, „Relax”, „Take It Easy” и „We Are Golden”.