Американскиот производител на чипови Интел ќе му исплати на својот поранешен извршен директор Пет Гелсинџер 10 милиони долари отпремнина, објави денеска компанијата во извештајот до американската Комисија за хартии од вредност – пишува Телеграф.рс.

Гелсинџер ја загуби довербата на извршниот одбор поради лоши резултати во Интел, кои беа означени како „катастрофални“, а од 1 декември повеќе не е директор на компанијата.

Приходите на Интел паднаа на 54 милијарди долари во 2023 година, што е за една третина помалку од 2021 година кога Гелсинџер ја презеде функцијата извршен директор.

Фирмата реше дека ќе укине повеќе од 15.000 работни места како дел од планот за намалување на трошоците од 10 милијарди долари и ја одложи изградбата на неколку капацитети за производство на чипови.

Аналитичарите очекуваат Интел да оствари загуба од 3,68 милијарди долари оваа година, што е негова прва годишна нето загуба од 1986 година.

Вчера пазарите позитивно реагираа на веста за заминувањето на Гелсинџер и акциите на Интел пораснаа за пет отсто, додава американската медиумска компанија.