Град Скопје потребно е итно да преземе чекори за конечно решавање на проблемот со депонијата Вардариште, а до тој момент неопходно е нејзино физичко затворање, преку затворање на сите пристапни патишта, 24-часовна контрола од МВР и од инспекцијата на Град Скопје. Ова е ставот на градоначалникот на Општина Гази Баба Бобан Стефковски, кој информираше дека општинските инспектори, заедно со полицајците од Гази Баба, започнуваат со секојдневни еколошки патроли на терен.

Граѓаните од Хиподром, Маџари, Железара и други населби низ општината постојано алармираат дека во воздухот се шири смрдеа на запалени гуми, бараат да се преземе нешто затоа што поради тоа не можат прозорци да отворат, бараат и да се најде конечно решение за Вардариште. Тие апелираат да се почитуваат законите, инспекторите навистина да се фатат за работа и да има сериозни казни за секого што пали и ја загадува околината.

Стефковски вели дека реакциите на граѓаните за загадување на амбиенталниот воздух како последица од недозволени дејства на поединци се оправдани. Поради тоа градоначалникот веќе презел неколку конкретни чекори, меѓу другото го задолжил Секторот за инспекциски работи во следниот период да спроведува теренски контроли секој ден во две смени.

 Пратив писмено барање до Град Скопје под чија директна надлежност е дивата депонија Вардариште за постапување на градските инспекциски служби во санкционирање на лицата што вршат спалување на разни видови отпад. Град Скопје потребно е итно да преземе чекори за конечно решавање на проблемот со депонијата Вардариште, а до тој момент неопходно е нејзино физичко затварање, преку затворање на сите пристапни патишта, 24-часовна контрола од МВР и од инспекцијата на Град Скопје – информира Стефковски.

Според него, веќе се утврдени неколку критични точки на кои несовесните граѓани го вршат спалувањето и таму ќе има редовна контрола. Тој најавува дека Општината во соработка со надлежни институции ќе го санкционира секој сторител на вакво или слично дело, со кое го загрозува животот и здравјето на граѓаните.

Граѓаните се со различни реакции во врска со информацијата на градоначалникот за теренските контроли на инспекцијата. Мнозинството му изразува поддршка, но има и такви што велат дека се реагира дури откако граѓаните ќе кренат врева во јавноста.

Не се борите вие, туку народот се бори секојдневно и тоа со години наназад, сега кога зовреа социјалните мрежи решивте да преземете некакви мерки како овие „вонредни патроли“, кои секако ќе имаат секундарен ефект. Нема тука поединци или несовесни граѓани, сторителите мора кривично да одговараат, а државата со сите механизми да го заштити воздухот на граѓаните зашто и со Уставот на РМ секој граѓанин има право на здрава животна средина. Пријавуваме во општини, инспекторати, полиција, споделуваме на социјални мрежи каде што секојдневно се пали и тоа со години се влече проблемов како и сѐ друго оваа држава – коментира жител на Гази Баба.

Некои од граѓаните посочуваат и други локации и диви депонии каде што секоја вечер се пали, па како што велат, секојдневно се гушат, околината се загадува и никој ништо не презема. Има и граѓани што се жалат на друг вид смрдеа, особено од населбите во поруралните делови од општината – на неподнослива смрдеа од кокошарниците и од свињарниците во комшиските дворови.