Државниот здравствен и санитарен инспекторат денеска влезе во вонреден инспекциски надзор на Клиниката за детски болести во Скопје, откако таму починало 7-месечно бебе, кое според семејството неколку денови пред смртта било донесено во болницата, но не го хоспитализирале по што состојбата му се влошила. Директорот Реџеп Мемеди за медиумите изјави дека бебето имало генетски проблеми, нешто што семејството го негира.

Директорот на ДСЗИ Кирил Лазов вели дека лично го издал налогот за вонредна инспекција по сознанието за починато седумесечно бебе кое по искажување на актуелниот директор било донесено со тешки оштетувања на повеќе органи.

-По утврдување на фактичката состојба, во делот на приемот, во делот на пружање на здравствена заштита, како и евидентирање, ние претпоставувам дека во текот на утрешниот ден ќе излеземе со поконкретни податоци, појасни директорот.

Тој рече дека вонредни инспекциски надзори се вршат и на други клиники во рамки на Клиничкиот центар Мајка Тереза во Скопје.