Од 1 јануари, секој граѓанин и секоја фирма или институција, преку електронска пошта, односно по имејл, може да поднесува иницијативи, барања и предлози до Уставниот суд.

Како што информираат денеска од Уставниот суд, електронското поднесување на поднесоци е овозможено преку интернет-страницата на Судот, односно преку категоријата „обраќање до судот”, каде во поткатегоријата „електронско поднесување на поднесоци” се наведени насоки за начинот на електронското поднесување.

Поднесувањето на електронските поднесоци е предвидено со Правилникот за електронско поднесување на поднесоци до Уставниот суд, кој е објавен на интернет-страницата на судот.

Ова, како што велат од Уставниот суд, ја олеснува постапката за поднесување иницијативи за оценување на уставноста на одредени правни акти, со оглед на тоа што граѓаните не мора лично да доаѓаат и иницијативите да ги доставуваат во архивата на судот. Тоа ќе овозможи правдата да биде подостапна за сите граѓани, без оглед на нивното место на живеење, велат од Уставниот суд.