И покрај континуираното реформирање и вложување во нови проекти, квалитетот на образованието во Македонија е на рекордно ниско ниво и во континуиран пад. Системот првенствено ја девалвира наставничката струка и притоа продуцира ученици лишени од применливо знаење, изгубени во хаотичните лавиринти од реформи кои не се базираат на реалните состојби и потреби на образовниот систем.

Одличните основци одговорија за „тројка“ на тестовите за упис во Гимназијата „Орце Николов“

Ова накратко е сублимираниот заклучок на соговорниците со кои „Слободен печат“ разговараше во врска со последните случувања кои се во фокусот на вниманието деновиве по веста дека многу мал процент од основците петкаши, го потврдија својот успех на тестирањето за запишување во гимназијата „Орце Николов“ во Скопје.

Викторија Кафеџиска комуниколог, доктор на науки, професорка на Меѓународниот балкански универзитет коментирајќи ги случувањата кои се актуелни со скопската гимназија, но и состојбите во образованието општо, вели дека тоа е отсликување на работите во општеството. Според неа проблемот со оценувањето но и образованието во земјава е многуслоен и потребни се системски решенија за надминување на состојбите за кои за жал во моментов недостасува политичка воља.

– Оценувањето на учениците во сите степени на образовниот систем низ годиниве стана проблематично. Тоа е најизразено во средното и основното образование, а причина за тоа е во губењето на авторитетот на наставникот или професорот додека ние се соочуваме со „инфлација“ на петки. За ваквиот систем на оценување секако дека вината лежи кај наставниците, но чинам дека тој се создаде токму од притисокот на родителите и мислата „кој е тој наставник да го оценува моето дете“. Од тука линијата на помал отпор кај наставниците да се даваат оценки кои можеби не ги имаат заслужено учениците стана пракса која деновиве гледаме каде не донесе – вели проф. Кафеџиска.

Според Кафеџиска во изминативе триесет години низа реформи беа спроведени во образованието, но, остана проблемот што државата нема јасна стратегија за образовен развој, којашто пак нема да зависи од тоа која политичка партија е на власт.

– Последните години со онлајн наставата, штрајковите на професорите и отсуството на децата од училишните клупи направија дисконтуитет во образованието кај учениците независно дали тоа е во основното, средното или високото образование. Второ, високиот број на универзитети во земјава и нивната битка да добијат повеќе студенти допринесува да има стагнација и опаѓање на образованието. Решение за овие состојби на краток рок се тешки, но доколку државата сериозно пријде на проблемот тој може да се надмине – посочува проф. Кафеџиска.

Слично размислува и Елизабета Секирарска, долгогодишна професорка. Таа гостувајќи во Утрински брифинг посочи дека општеството е свесно дека предолго не функционираат нештата во образованието и тој проблем не е од сега туку се провлекува со децении.

– Ова е еден од многуте аларми кои се постојано вклучени во последниве 30 години. Како која гарнитура ќе дојде на власт, првата работа е да се исклучи алармот. Ако од 292 кандидати само 11 го задржале својот успех, а бројот на единици е огромен, тоа е страшно. Образованието е клучно, а ова што се случи во гимназијата Орце Николов покажува каде сме ние, ние ги изгубивме децата по пат – вели Секирарска.

Во меѓувреме повеќе меѓународни и домашни истражувања ги посочуваат катастрофалните состојби во образованието, но и проблемите што законите не се применуваат, а институциите потфрлаат во вршењето на својата работа.

Последното истражување кое го објави webometrics.com наведува дека речиси сите македонски универзитети и високошколски установи имаат пад на нивното последно рангирање. Па така од вкупно 22 универзитети, само 5 се подобро рангирани во споредба со податоците од пред една година.

Најголем пад на листата има Меѓународниот Славјански Универзитет во Свети Николе, кој назадувал преку 2000 позиции на листата. Големи падови имаат и Универзитетот за туризам и менаџмент (-1449 места), Универзитетот Американ Колеџ (-1040 ) и Универзитетот „Свети Климент Охридски“ во Битола (-865).

Универзитетот „Свети Кирил и Методиј“ (УКИМ) се најде на 1.594 место во светот, што е пад од 101 место во споредба со рангирањето пред околу година дена. Во споредба со регионот, најголемиот македонски универзитет се наоѓа далеку зад најголемите универзитети во Грција, Србија, Словенија, Бугарија и Хрватска, додека подобро стои од универзитетите во Босна и Херцеговина, Црна Гора, Албанија и Косово.

Одличните основци одговорија за „тројка“ на тестовите за упис во Гимназијата „Орце Николов“