Приватна индиска авиокомпанија казни двајца своите пилоти бидејќи наводно пиеле кафе во пилотската кабина за време на лет, пренесува „Би-Би-Си“.

Инцидентот се објави во јавноста откако на социјалните мрежи се појави фотографија од отворена чаша поставена на контролната табла на авионот СпајсЏет. Фотографијата предизвика бес, што го натера индиското воздухопловно регулаторно тело да издаде предупредување до авиокомпанијата.

СпајсЏет соопшти дека го истражува случајот и дека ги казнила двајцата пилоти.

„Против нив ќе бидат преземени соодветни дисциплински мерки по завршувањето на истрагата“, изјави портпаролот на авиокомпанијата за весникот „Тајмс оф Индија“.

Индиските правила за авијација им дозволуваат на пилотите и екипажот да имаат храна и пијалоци во пилотската кабина, но според строги упатства. На пример, сите чаши треба да имаат капаци и да се носат на послужавник за да се избегне истурање.

Последниот инцидент, наводно, се случил на лет кој летал од Делхи до североисточниот град Гувахати на 8 март, на денот на хинду фестивалот Холи.

На фотографијата е прикажана непокриена шолја за кафе, со логото на авиокомпанијата, поставена на рачката за стартување на авионот, додека пилотите, кои не се видливи на сликата, јаделе гуџии – слатко пржено пециво кое традиционално се јаде на Холи.