Група Индијци креирале лажен турнир во крикет наречен „Индиска Премиер Лига“ со неколку земјоделци кои глумеле дека се играчи за да ги примамат руските обложувачи во огромна измама слична на онаа од филмот „Стинг“ од 1973 година, пишува „Гардијан“.

Лажната „Индиска Премиер Крикет Лига“ стигнала до нејзиното четврт-финале, пред полицијата да интервенира.

Турнирот започнал три недели по вистинското натпреварување во мај, велат од полицијата. Но, тоа не било пречка за бандата, за која велат дека изнајмила фарма во западната држава Гуџарат, каде ги одржувале натпреварите.

Тие изградиле терен за крикет, наместиле скапи камери какви што користат и на вистинското натпреварување и преку интернет натпреварите ги снимале во живо и ги пренесувале на социјалните мрежи, под името „ИПЛ“.

Групата наводно вработила неколку млади земјоделци, плаќајќи ги 400 рупии по натпревар (4,20 долари).

Едните исти играчи постојано си ги менувале дресовите. Нивните дресови биле од вистинските тимови од Индиската крикет лига.

Тие на нивните видеа инсталирале лажни звуци од публика кои ги симнале од интернет, а имале и лажни коментатори.

Камерите биле точно поставени за да не покажат ништо повеќе од теренот на кој се играло.

Руските обложувалници преку апликацијата Телеграм биле измамени да се обложуваат на овие натпревари.

А, во зависност чија добивка била најголема, Индијците од претходно знаеле како да ги наместат натпреварите и кои сценарија да се случат во текот на натпреварот.

Бандата според полицијата заработила речиси 300 илјади рупии (3 илјади долари).

Оваа случка наликува на холивудскиот филм Стинг од 1973 година, со славните Пол Њуман и Роберт Редфорд, каде група луѓе креираат лажна страна за обложување за да измамат гангстер.

Од официјалната Индиска крикет лига засега нема коментар за ваквата измама.