Имало-немало, за слава пари ќе се најдат
И тие што слават се свесни дека трошокот е голем, но секогаш наоѓаат начин да ги нагостат семејството или пријателите еднаш годишно, иако славењето може да растегне на два до три дена. Некои со печење, други со риба, задолжително сарма, погача и колачи, на трпезите ќе има од се по нешто…
Од 20.000 до 50.000 денари годинава за дваесеттина гости, во просек ќе потрошат македонските домаќини кои го слават Митровден. Граѓаните велат дека „имало-немало“ за слава пари ќе се најдат, иако сите се согласни дека трпезата сега им е поскапа од лани за 20 отсто. И тие што слават се свесни дека трошокот е голем, но секогаш наоѓаат начин да ги нагостат семејството или пријателите еднаш годишно, иако славењето може да растегне на два до три дена. Некои со печење, други со риба, задолжително сарма, погача и колачи, на трпезите ќе има од се по нешто…
Препорачано
Годинава, бидејќи славата Митровден се паѓа в петок, производите мора да се посни, а рибарниците тријат раце. Велат дека потрошувачката на риба за оваа слава е неспоредлива со онаа за Свети Никола, но сепак деновиве очекуваат да продадат меѓу 1 и 2 тони свежа риба. Граѓаните со кои разговараше „Слободен печат“ велат дека купуваат најмалку 10 килограми разни риби, а најголемиот дел од нив сами си ги подготвуваат. Цените на свежата риба се движат до 1.000 денари за лосос, а пастрмката, скушата, крапот или ципурата чинат до 500 денари.
-Годинава ќе имаме помалку гости, но нема да потрошиме помалку од дваесеттина илјади денари. Земаме пастрмка, скуша и ослиќ и сами си ги печеме. Гледаме дека се е поскапено за разлика од лани, ама трпезата мора да крцка – ни рече една брачна двојка на Зелениот пазар.
Освен рибата, домаќинките набројуваат дека мора да имаат погача, посна сарма, макало, ајвар, кисела туршија, маслинки, ситни колачиња и баклава. Башка трошок се пијалаците.
За да се подготват, граѓаните од раните утрински часови, чекаа трпеливо пред рибарницата, за да си ги земаат нарачаните риби, ама откако ќе им ги исчистат.
-Неспоредлива е продажбата на риба за овој празник, со онаа за Свети Никола, но годинава Митровден се падна во петок, а тоа значи дека мора да се јаде посно. Рибата за разлика од лани е поскапена, но сепак, секој кој слави купува не помалку од 10 килограми, а и нагоре – велат во една рибарница. И оние кои печат риби веќе неколку дена се затрупани со нарачки. Продавачите велат дека тие им се продолжена рака на домаќините, кои не сакаат домот да им замириса, а убедуваат и дека воопшто нема никаква разлика ако купите свежа или печена риба.
За оние кои денес прават заслуг, трпезата мора да се мрсна, а кралицата – сармата годинава е покапа заради цената на зелката. За оваа трпеза се задолжителни печените меса, руската салата, кифличките, даските со сирења и сувомесни производи, торти, колачи или баклави. Фурните кои печат месо нудат цело печено прасе по цена од 5 до 6.000 денари. Една славска погача украсена со сите нишани се продава по цена од 150 до 200 денари, килограм кифлички може да нарача и за 250 денари. Готовите крем салати се продаваат од 390 до 450 денари килограм. Тортите се посебна приказна и се движат со 1.300 динари во зависност од големината, а за 1.000 денари може да си нарачате и ситни колачиња.
Низ годините, но почесто во поголемите градови, фрчат нарачки од фирмите за кетеринг. Одтаму брифираат дека се заштедува време за подготовките, но овие услуги се исто така поскапени за најмалку 10 отсто во однос на лани.
Народните верувања велат дека во пресрет на Митровден и Ѓурѓевден секој треба да биде дома, бидејќи кој тогаш не е дома, цела година ќе ја помине ноќевајќи во туѓи куќи. Ова се смета и за најважен митровденски обичај.
