Министерот за здравство Арбен Таравари денеска ја посети ГОБ „8 Септември“ и најави децентрализација на здравствените услуги за онколошките пациенти, без притоа да има одобрен условен буџет од Фондот за здравство за терапии кои би требало да ги примаат онколошките пациенти.

Ни акцелераторот во болницата не работи, а Таравари смета дека барем наредните 6 месеци нема да проработи. Во ГОБ „8 Септември“ децентрализацијата на онколошките пациенти ќе почне само со амбулантско-консултативни прегледи.

-Со директорот на ГОБ „8 Септември“ Синиша Стојановски и директорот на Клиниката за онкологија Игор Стојковски ги посетивме амбулантите за онкологија во ГОБ „8 Септември“.

Дневната амбуланта треба да профункционира за неколку недели, акцелераторот не функционира ама мислам дека може да се стави во функција. Денеска не промовираме ништо. Само ќе кажеме дека дефинитивно може да се каже дека има решение од Министерството за здравство, односно одобрена е одлука на влада за да можат амбулантски и консултативни прегледи за онколошките пациенти да се вршат во ГОБ „8 Септември“.

Се надевам дека набрзо Фондот за здравство ќе одобри условен буџет. Тука се вработени двајца онколози и секако дека полесната онколошка терапија и одредени прегледи може да се вршат тука, рече Таравари.

Тој најави дека наредниот период ќе се фокусира на болниците во Битола и во Тетово за да види што може да се направи таму во поглед на децентрализацијата. Најголемиот дел од онколошките пациенти се лекуваат на Клиниката за онкологија и во целата држава и во јавното и во приватното здравство има само 46 онколози. Недостасуваат медицински сестри, но и друг помошно-технички кадар.

-Во меѓувреме ќе треба Клиниката за онкологија и ГОБ „8 Септември“ да склучат договор за онколошките пациенти што ќе доаѓаат во ГОБ „8 Септември“ да бидат под капата на Клиниката.

Се надевам дека за еден месец одредена терапија ќе почне да се прима во ГОБ „8 Септември“ со што ќе ја ослободиме Клиниката за онкологија делумно. Ги посетивме и хируршките сали и мислам дека се во неубава состојба и треба да се интервенира.

Но ќе видиме со буџетот за 2025 година каква ќе биде состојбата. Мислам дека салите во ГОБ „8 Септември“ заслужуваат реновирање, смета министерот за здравство.

Во ГОБ „8 Септември“ фалат и специјалисти и сестри. Таравари се надева дека до крајот на годината ќе се обезбедат пари за нови вработувања.

За амбулантите да почнат да работат, не се потребни други пари, освен буџет за терапијата. Но и на тоа се чека.

-Знаете дека 5-6 пати овде доаѓале разни министри и промовирале дека акцелераторот почнува да се користи. Искрено, ситуацијата изгледа добро кај што е поставен, но ќе го дојдеме да го промовираме дури откако ќе бидат зрачени двајца или тројца пациенти, рече Таравари.

До крајот на годината тешко дека ќе има покачување на платите во здравството, искрен е министерот.

-Имаме огромен буџетски дефицит. Со синдикатите имавме состанок и ќе побарам разбирање евентуално за идната година, а оваа година невозможно е да се донесе нов колективен договор.