Илјадници луѓе се собраа на мирен протест во Париз за да ја поддржат француската екстремно десничарска лидерка Марин Ле Пен. Поддржувачите вееја француски знамиња и извикуваа „ние ќе победиме“ .

Судот во Париз минатата недела ги осуди Ле Пен и дваесетина членови на партијата Национален собир за проневера на фондови на ЕУ и изрече казна со која ќе ѝ забранува да се кандидира на претседателските избори во Франција во 2027 година, освен ако успее да ја поништи пресудата во рок од 18 месеци.

Нашата борба ќе биде мирна и демократска борба. Го земаме за пример Мартин Лутер Кинг кој ги бранеше граѓанските права затоа што „денес станува збор за граѓанските права на Французите“, рече таа преку видео-конференција одржана со членовите на италијанската Лега, антиимиграциската партија на Матео Салвини.

Судската пресуда беше голем удар за Ле Пен. Таа се жалеше на  одлуката на судот и вети дека ќе ги искористи сите алатки и правни средства за да може да се кандидира во 2027. Судот соопшти дека ќе донесе одлука за жалбата во летото 2026 година.

Анкетата спроведена од „Елабе“ во саботата покажа дека Ле Пен останува фаворит за победа во првиот круг од претседателските избори со поддршка меѓу 32 и 36 отсто, пред поранешниот премиер Едуар Филип, кој според анкетата има меѓу 20,5 и 24 отсто од гласовите.

Но, нападите на Ле Пен и нејзините сојузници врз „тиранијата на судиите“ не наидоа на поддршка ниту кај некои нејзини поддржувачи, особено откако главниот судија во нејзиниот случај беше ставен под полициска заштита по смртните закани.

Повеќето Французи не гледаат никаков проблем во одлуката на судот.

Околу 65 отсто од испитаниците рекле дека „не се шокирани“ од пресудата, а 54 отсто рекле дека Ле Пен била третирана како и секој друг обвинет.

Во друг дел од градот пак,  приврзаниците на левичарските партии се собраа во знак на протест против нападот на Ле Пен врз француската држава.