Илиевски: Унгарците играат брза кошарка, треба да ја спречиме нивната игра во транзиција
Најдобрите македонски кошаркари тргнаа на пат за Шолнок, каде викендов следува вториот претквалификациски натпревар за пласман на Светскиот куп 2027 против репрезентацијата на Унгарија.
Препорачано
Немаше многу време за одмор и некои посериозни анализи на она што беше во саботата навечер во Куманово, оној премиерен меч од претквалификациите, кои за жал, го загубивме од Романија.
– Морам да го повторам тоа, се надевам дека во иднина нема да морам, тоа што значи како предност за екипите кои што се заедно, и играчите кои што имаат свои улоги во клубовите. Она што е наш недостаток е новото создавање на оваа репрезентација. Паралелно на сето тоа, овие наши играчи, немаат забележителна улога во екипите за кои настапуваат.
Она што ќе го истакнам за последниот натпревар, тоа беше натпревар каде треба да ги пофалам сите момци кои го дадоа својот придонес на паркетот, својата енергија. Сето она кое што следи, ќе доаѓа со нивното искуство за вакви натпревари. Се надевам дека во сето тоа ќе имаме подобрување. Можеби нема да дојде преку ноќ, можеби нема да дојде во овој „прозорец“ сега. Меѓутоа, ова ќе значи многу за она што претстои – рече Илиевски.
Потенцира една особено важна работа во овој процес на подмладување на сениорскиот национален состав:
– Бројките не ни значат ништо во однос на индивидуални решенија од самите наши поединци. Туку ни значи сето она што се вика колектив. Мислам, поточно убеден сум дека на средбата со Романија се гледаше дека функционираме како тим – вели нашиот селектор.
В сабота ќе играме против Унгарците со почеток од 18.00 часот во Шолнок во претквалификациската група:
– Унгарците се една атлетска екипа, која што игра брза и модерна кошарка. Екипа каде сите играчи шутираат од сите позиции. Нивниот играч Војвода, е со најголема возраст, и е клучен играч во таа репрезентација. Сето она кое што треба да го направиме, е да ја спречиме таа нивна игра во транзиција. Да се обидеме сите отворени шутеви да ги затвориме. Сето она кое што е наша особина, и наша карактеристика, колку што можеме да го подобриме нападот. Бидејќи одбраната е желба, а кај нас таа постои. И нормално е дека секогаш постои простор да се поправа. Тоа, заедно со малку поголема самодоверба кај младите играчи да го реализираат тоа во нападот, верувам дека сето тоа ќе изгледа многу поразлично – се зборовите на Илиевски.
