Невозможно е прецизно да се прогнозира дали годинава власта ќе ги реализира уставните измени или опозицијата ќе издејствува предвремени парламентарни избори, е оцената на политичките аналитичари. Но, извесно е дека ако нема уставни измени, тогаш дефинитивно следува политичка криза, чија можна разрешница ќе бидат предвремени парламентарни избори.

Власта веќе најави дека на самиот почеток од новата 2023 година, ќе почне консултации со партиите за да обезбеди двотретинско мнозинство за да почне процесот на уставни измени за Бугарите и други делови од заедници да станат дел од Уставот, што, пак, е неопходно по завршувањето на скринингот во ноември земјава да ги почне преговорите со ЕУ. Опозициската ВМРО-ДПМНЕ останува на ставот дека нема да поддржи уставни измени и се надева на 61 пратенички глас за распуштање на Собранието и на предвремени избори во мај.

Политичкиот аналитичар Благојче Атанасовски смета дека од политичка гледна точка, оваа година ќе биде интересна, бидејќи ќе се најдеме во цајтнот околу отворање на Уставот и внесување на бугарското малцинство како услов без кој не може да се отворат фактички и суштински поглавјата и кластерите со ЕУ.

– Власта ќе се соочи со одбивањето на опозицијата да учествува во процесот, без чии пратеници нема двотретинско мнозинство, а опозицијата ќе се соочи со притисок од Американците да го поддржи процесот. Лидерот Христијан Мицкоски сам се навлече во политичка тесна кожа: од една страна ако ги поддржи уставните измени ризикува да изгуби значаен дел од своето тврдокорно гласачко тело на контото на Левица, а ако ги блокира навистина да биде изолиран од меѓународниот фактор како руски играч во Македонија, кој ја кочи европската интеграција на Македонија. Невозможно е прецизно да се прогнозира исходот, но ако нема уставни измени, дефинитивно ќе има политичка криза што може да резултира со предвремени избори. И по нив, при хипотетичка ситуација опозицијата да победи и да формира влада, повторно ќе треба да го истурка процесот на внесување на Бугарите во Уставот. Најавите за репреговарање со Бугарија за поповолен договор се само сеење магла. Во тоа можат да веруваат само најголемите наивци, луѓе што немаат врска со животот, камоли со меѓународните односи и политика – смета Атанасоски.

Според него, секој евентуален нов меѓународен договор и со Грција и со Бугарија може да биде понеповолен за нашите национални и државни интереси. Атанасоски додава дека тоа е само популистичка реторика на Мицкоски, во која ниту тој самиот не верува, односно е свесен дека не е можно да се реализира во практиката.

Мицкоски очекува годинава да биде изборна

Лидерот на ВМРО-ДПМНЕ Христијан Мицкоски и вчера повтори дека очекува годинава да биде изборна.

– Значајно е 2023 година да биде изборна за народот да добие влада што ќе ја избере, а не премиер избран во тесен круг луѓе. Потребни се предвремени парламентарни избори и ги поздравувам сигналите што доаѓаат од дел од пратениците на СДСМ и на ДУИ дека треба да дојде крајот на оваа влада и да дојде влада избрана од народот, која ќе има капацитет да се справи со предизвиците. Се надевам дека нема да бидат применети методите познати и видени во минатото на оваа влада на ДУИ, поддржана од СДСМ, на притисок врз тие пратеници и дека ќе ги остават тие пратеници што сега даваат позитивни сигнали, така и во иднина да продолжат да функционираат во Парламентот сè до изгласување на негово распуштање и организирање предвремени избори – изјави Мицкоски.

Мицкоски во предновогодишниот брифинг за новинарите рече дека најдоцна во јануари или на почетокот на февруари ќе се знае дали ќе има предвремени избори. Тој лицитира со два датума за избори – 14 мај и 21 мај, односно по Велигден и Рамазан. Во таков случај кампањата би требало да почне по 25 април. Мицкоски смета дека токму пратениците што му даваат сигнали треба во СДСМ да издејствуваат предвремени избори.

Власта не отстапува од изборна 2024!

Приоритет за владините партнери СДСМ и ДУИ остануваат измените на Уставот и отворање на поглавјата на крајот на годинава. И премиерот Димитар Ковачевски и лидерот на ДУИ Али Ахмети повторуваат дека изборите ќе бидат во редовниот термин во 2024 година. Власта порачува дека е потребно сите 120 пратеници да гласаат за измените на Уставот, а за таа цел веќе деновиве во Собранието се очекува да почнат формални консултации во кои ќе бидат вклучени експерти, невладини и политичари. И Ковачевски и вицепремиерот Бојан Маричиќ се децидни дека следната блокада што ни се заканува на патот кон ЕУ е таа од ВМРО-ДПМНЕ ако не се постигне консензус за Уставот.

– Секое поместување од европскиот пат, а тоа ќе се случи доколку опозицијата не даде поддршка за уставните измени, ќе биде само несигурност, неизвесност, политичка криза и повторно ставање на Северна Македонија во чекалницата. Следната блокада може да биде ВМРО-ДПМНЕ – вели Маричиќ за „Слободен печат“.

СДСМ на изјавите на Мицкоски за предвремени избори реагира дека лидерот на ВМРО-ДПМНЕ е „заложник на Левица и под сенка на осудениот бегалец Груевски, уплашен за својата фотелја“.

– Како што ја заврши 2022-ра, така заложникот на Димитар Апасиев и Левица, Христијан Мицкоски, ја започна и 2023 година – со невистини, со закани и со лажна надеж дека само што не дошол на власт. Исплашен за сопствената фотелја во „Белиот дворец“, Мицкоски по којзнае кој пат ја отвора приказната за ново парламентарно мнозинство и предвремени парламентарни избори. Дека Мицкоски уште е во заложништво на Апасиев покажува и неговиот речник и заканите со некаков „пеколен крај“.Мицкоски може заради лични внатрепартиски потреби да си прави сценарија за предвремени парламентарни избори, но факт е дека изборите ќе бидат редовни, во 2024 година – велат од СДСМ.