Лов на пратеници е во тек по разидувањето на Алијансата за Албанците (АА) на Арбен Таравари од коалицијата Вреди. Неизвесен е епилогот од комбинациите. Според брифинзи од партиите, не случајно средбата помеѓу премиерот Христијан Мицкоски и Таравари е по 1 Мај: се остава простор за прелети на пратеници пред Мицкоски да пресече дали ќе ѝ се заблагодари на Алијансата за учеството во Владата. Дека се очекуваат поместувања на политичката сцена потврди и првиот вицепремиер Изет Меџити. Според „математиките“ во Собранието, Вреди се обидува да задржи дел пратеници од АА на Таравари. Од друга страна, АА врбува пратеници од делот на АА, предводена од Зијадин Села, дури има и обиди АА на Села да го заземе местото на Алијансата на Таравари во Владата.

Партиите со кои контактиравме потврдуваат дека се прават обиди за политичко прегрупирање. И од Вреди и од АА на Таравари тврдат дека нивните пратеници се „сигурни“ и дека АА на Села нема да ја смени страната. Меџити, пак, во изјава за „Лајм“ навестува превирања, но не прецизира дали АА на Села ќе стане дел од Владата по евентуалното заминување на Таравари од власта. Тој рече дека по воспоставената соработка меѓу лидерот на ДУИ Али Ахмети и Таравари се очекуваат големи потези на политичката сцена.

– Има изјави дека Европскиот фронт повеќе не постои. Ова го изјави господинот Таравари. Однадвор подобро ја знаат ситуацијата отколку внатре, во Фронтот. Значи, овде г. Ахмети го прекрши правилото за соработка со делови од Вреди, односно со Таравари. Ако е така, играта не е завршена, очекувам поголеми движења – вели Меџити.

Но, Кренар Лога од АА на Села експресно му возврати на Фејсбук. Тој порача дека наивно е да се верува дека тие би влегле во Владата, зашто „оваа влада е антиалбанска“, со што ја исклучи можност да влез во Владата на Мицкоски.

Ако Мицкоски ѝ се заблагодари на АА на Таравари за учеството во Владата, мнозинството останува без пет пратеника. Неофицијално, битката е владејачкото мнозинство да не изгуби пратеници Албанци зашто во таков случај во Собранието ќе нема Бадентерово мнозинство, што оди на контото на Европскиот фронт и ќе ја зацементира тезата дека Вреди нема легитимитет во Владата, односно легитимитетот ќе им се сведе на девет спрема 23 пратеника од кои дел од Фронтот, а дел од АА на Таравари. Мицкоски и натаму ќе има мнозинство од 73 пратеника, но ќе се соочи со предизвикот со локалните да распише и предвремени парламентарни избори.

Каква ќе биде разврската, ќе се знае по средбата Мицкоски – Таравари. Пратениците на АА на Таравари уште се дел од Вреди, иако лидерската тројка Меџити, Билал Касами и Зеќирија Ибрахими ги „самоисклучија“ од коалицијата. Вицепремиерот Арбен Фетаи од АА на Таравари рече дека засега остануваат дел од Владата.

– АА е во Владата, нема планови за промена на нашите позиции. Продолжуваме со работа, секојдневно, како ништо да не е сменето. Вчера имавме владина седница на која не беше кажана ниту една загриженост. Сметам дека нема простор за еднострани потези од ниту една партија и дека мора да размислуваме за стабилноста на оваа Влада. Алијанса со своите 5 пратеници е клучна за стабилноста на овој состав – рече Фетаи.

Тој потврди дека премиерот  наредните денови ќе има одделни средби со коалициските партнери АА, Вреди и ЗНАМ. За тоа како Алијанса ќе настапи на локалните избори Фетаи рече:

-Не сакам да го прејудицирам исходот од различните контакти што се случуваат во оваа фаза. Сега засега, додека разговараме и додека нема одлука меѓу коалициските партнери, ние сме дел од Владата. Не сме исклучени, продолжуваме да придонесуваме во парламентарното мнозинство. Нашите пратеници продолжуваат да ја вршат својата работа, а ние во извршната власт. Јас се надевам дека ќе се најде решение што ја нуди најдобрата понуда за граѓаните на оваа земја, како за локалните избори, така и за предвремените парламентарни избори ако тие се случат и кога и да се случат.

Меџити повтори дека очекува Таравари, како што ја напушти Вреди, да ја напушти и Владата.

– Ние одлучивме дека Вреди ќе биде едно. Ќе се стопат сите политички партии во Вреди оти тоа го бараат нашите гласачи. Одлучивме дека и соработка со ДУИ и останување во Вреди не е можно и мислам дека и соработка со ДУИ и дел од Владата не оди. Нема логика да се соработува со ДУИ и да се биде дел од Владата – рече Меџити.