Идните директори на полицијата ќе може да седнат на функцијата само со факултет од било која општествена наука а не специфичен факултет за безбедност како што беше досега, а наредните полициски началници ќе може да водат сектори и без да имаат раководно полициско искуство според измените на Законот за полиција кои се во собраниска процедура, објави Телма.

Идните директори на Бирото за јавна безбедност, главниот дел на македонската полиција, нема да мораат да одат на факултети за одбрана и безбедност, право или економија туку со предложените законски измени, директор ќе може да биде оној кој завршил било каков факултет од кампусот на општествени науки без разлика дали е поврзан со полициско-безбедносната област или не.

Како што објави телевизијата, со друг член се намалува кругот на потенцијални кандидати за највисоката професионална позиција во полицијата, во Бирото за јавна безбедност. Досега директори можеа да станат сите оние кои имале 12-годишно искуство и 5-годишно раководно искуство во безбедноста, одбраната и разузнавањето, а отсега таа функција ќе може да ја вршат искусни полициски началници.

За познавањето на англиски јазик, јазичните критериуми се олеснети па наместо ТОЕФЛ и ИЕЛТС се бара само обично уверение за англиски, германски и француски.

Со измените, директорот на Бирото за јавна безбедност добива и клучна улога во истрагите преку нов член кој утврдува дека директорот на БЈБ издава наредби од областа на полициското и криминалистичкото работење.

Има и значајни промени во условите за избор на идните началници на Секторите за внатрешни работи кои ги има 8 во државата и се веднаш под директорот на Бирото. Со предлог законот се брише клучната одредба за потребно искуство за таа функција. Досега, полициските началници во СВР Скопје, Тетово, Куманово, Охрид, Струмица, Штип, Битола и Велес требаше да работат минимум 6 години во полиција од кои најмалку 4 години на раководно место. Но тој услов сега е поништен и не е потребен за да се биде началник. Со законот е сменет бројот на полициски станици со општа надлежност, односно полициски станици кои функционираат 24 часа. Во Скопје се додадени три нови такви станици, Бутел, Илинден и Сарај, а повторно се брише од тој список- еден од поголемите објекти, станицата Бит пазар, пишува Телма.