Владата ќе се задолжува за нови над една милијарда евра. Планот е околу 70 милиони евра да бидат кредити од домашните банки, а останатите 950 милиони евра идната година да се обезбедат преку еврообврзница односно од меѓународните пазари, објави Телма.

За познавачите задолжувањето не е неочекувано, но велат дека е многу важно под кои услови ќе се обезбедат средствата за да не се доведеме во ситуација стари долгови да ги враќаме со поскапи кредити.

– Редовното финансирање на долгот е обврска на Министерството за финансии и на Владата и тоа треба да бидеме свесни дека ќе се случува. Клучното прашање треба да ни биде дали добиваме подобри пазарни услови ако излеземе на пазар или добиваме подобри пазарни услови ако најдеме други начини на финансирање. Ако се сеќавате, пред извесен број години се зголеми интензитетот на задолжување на домашен пазар, затоа што се видоа поповолни услови и кај банките и таквите институции да финансираат во такви инструменти. Но, ризикот таму е ако премногу се задолжуваме на домашен пазар, тогаш имаме можност за истиснување на тој дел на тој кеш што им е ставен на располагање на банките да можат да ги инвестираат, односно да им ги дадат на приватниот сектор што треба да инвестира во нови проекти. Затоа тука треба многу внимателно и ова е работа на професионалци во Министерството за финансии – изјави вели Виктор Митевски од ЗМАИ, Здружение за истражување и анализи.

Министерката за финансии Гордана Димитриеска-Кочоска пред еден месец соопшти дека веќе се работи на подготовка за издавање нова еврообврзница за следната година, со цел да се обезбедат средства за сервисирање на еврообврзницата што доспева во 2026 година што е во износ од 700 милиони евра.

При носењето на ребалансот на буџетот, Фискалниот совет ја подвлече важноста на фискалната консолидација, усогласеност со фискалните правила и подобрување на ефикасноста во трошењето на јавните средства, со особен акцент на капиталните расходи и на социјалните трансфери како дел од структурните предизвици на буџетот.
Планираните приходи по основ на домашно и странско задолжување за годинава се 1,62 милијарди евра и тие со ребалансот се зголемија за 73,8 милиони евра.