Платформата за кариерни ресурси Resume Genius објави извештај во кој се рангираат 10-те најдобри работни места за лица над 55 години. Листата е составена врз основа на три клучни критериуми: високи плати, ниски барања за физичка работа и голема побарувачка на пазарот. Земени се предвид работни места за кои е доволна диплома за завршено високо образование и каде што веќе се вработени значителен број постари лица.

Според извештајот, на прво место се менаџерите за продажба, кои водат продажни тимови и работат на стратегии за привлекување нови клиенти. Оваа работа бара минимална физичка активност, а просечната плата по час е 66,38 долари- пренесе Каматица.

Натан Сото, кариерен советник во Resume Genius, истакнува дека искуството е високо ценето во сите индустрии.

„Многу работодавци бараат постари кандидати за лидерски и менаџерски позиции. Не плашете се да истражувате нови области; вашите вештини може да бидат повредни отколку што мислите“, рече Сото.

Работни места како што се сметководители и ревизори се исто така идеални за постари лица, бидејќи нудат флексибилно работно време, опции за сезонска работа и консултантски услуги. Овие работни места, заедно со оние во менаџментот и ИТ, се на листата.

Еве листа на најплатени работни места со голема побарувачка и минимален физички напор, според платформата Resume Genius: менаџери за продажба, аналитичари на компјутерски системи и менаџерски аналитичари се први на листата. Следуваат сметководители и ревизори, менаџери на социјални и општествено корисни услуги и претставници за продажба (големопродажба и производство). Исто така препорачани се и менаџери за недвижности и менаџери во угостителството. За повозрасните препорачани работни места се и агенти за продажба на осигурување и агенти за недвижности. Листата покажува дека искуството, знаењето и вештините стекнати за време на кариерата сè повеќе се признаваат како клучен капитал на пазарот на трудот, особено на менаџерски, консултантски и аналитички позиции.