Ако дете дојде кај матичен лекар, а тој се сомнева дека тоа има мали сипаници (морбили), тогаш веднаш треба да му издаде упат за на Инфективната клиника. Откако детето ќе биде прегледано на Инфективната клиника, тогаш тоа треба да биде испратено во Институтот за јавно здравје за да му се направат анализи. Во случај на позитивитет, целото семејство ќе треба да биде во изолација. Изолацијата не е задолжителна и не е предвидена во закон, па затоа надежта е во добрата волја и свесноста на семејствата.

Ваков апел упати директорката на Институтот за јавно здравје, доктор Марија Андоновска, откако во земјава е констатиран вториот случај на морбили.

Таа повтори дека и во двата случаи годинава, децата не биле вакцинирани со вакцина против мали сипаници.

Во семејството на вториот случај, 12-годишен жител на село Долно Коњаре, општина Петровец,  две од пет деца не биле вакцинирани. Според клиничките податоци, првичните симптоми кај пациентот започнале на 30 август со ситно црвен исип најпрво на лицето, а потоа и на градите и грбот, покачена температура, секрет од носот, конјуктивит, кашлица и повраќање.

Родителите одбивале да ги вакцинираат двете деца кои не примиле вакцина за заштита од морбили.

– Тоа што можам да го кажам, е, дека според епидемиолошката анкета што е направена, исказите се дека немало многу контакти, ниту пак детето одело на училиште во населбата Петровец, село Долно Коњари, – рече доктор Андоновска.

Според епидемиолошката анкета, родителите и детето кажувале дека изминатите денови, откако се вратило од подрачјето каде престојувало во Србија, не одело на училиште ниту тоа, ниту неговото братче, кое исто така не е вакцинирано и негираат повеќе контакти.

„Велат дека контактите се во кругот на семејството“, рече Андоновска.

Првиот случај, регистриран во јуни, беше жител на струшко село.

Според податоците на ИЈЗ, лани бил пријавен еден случај на мали сипаници. Од 2014 до 2023 година, регистрирани биле вкупно 2,020 заболени.

Епидемии биле регистрирани во 2014, 2017, 2018 и во 2019 година.

Последната евидентирана епидемија од ова заболување, регистрирана во 2018 година, а завршена во 2019, била со вкупно 1,901 регистрирано лице, во 24 градови низ државата.

Вакцинација против мали сипаници се спроведува континирано и задолжително со две дози на МРП-вакцина. Првата доза се смета за примовакцинација и треба да се даде на првата година од животот на детето.

Ревакцината е на шестгодишна возраст. Опфатот со првата доза лани на национално ниво изнесувал 73,4 проценти, а во Скопје – 83,7 отсто.

Опфатот се ревакцинација на национално ниво лани била 87,7 проценти, а во Скопје – 85,9 отсто.

– Имајќи предвид дека опфатот на вакцинација е под 95 проценти, фактот дека следните месеци претставуваат сезонски врв на вирусот и можноста за импортирање, пријавувањето на нови случаи не е неочекуван настан – потенцираа вчера од ИЈЗ.