Нема клима за остварување на желбите на лидерот на ДУИ Али Ахмети – принципот „победник со победник“ да стане дел од правниот промет во државата, откако Европскиот фронт остана во опозиција.
Платформата за легитимитетот која Ахмети ја нарача од американскиот професор Пол Вилијамс за да се озакони принципот „победник со победник“ да прави влада (непишано правило од т.н. Мајски договор) уште неподготвена се отфрла од експертите и јавноста, а не поминува ниту кај една од парламентарните партии и од власта и од опозицијата.

Откако дел учесници во преговорите за Рамковниот договор за „Слободен печат“ оценија дека озаконување на принципот „победник со победник“ е во спротивност со Рамковниот договор и ќе значи преуредување на државата, и партиите од старт отфрлија каква било промена на Уставот по тоа прашање.

Владејачката ВМРО-ДПМНЕ ѝ порача на ДУИ дека конечно треба да сфати дека е во опозиција.

„Победник со победник“ би значело преуредување на државата

– ДУИ конечно треба да сфати дека е опозиција. Јавно да посочат каде во Мајскиот договор пишува коалицирање победник со победник. Уставот не е партиски памфлет на ДУИ – велат ВМРО-ДПМНЕ.

Владиниот партнер ЗНАМ, пак, не сака ни да дискутира на таа тема.

– Сите одредби од Рамковниот договор се исцрпени и имплементирани во Уствот и во законите. Секоја наредна постапка е нова ситуација за која нема простор за дискусија – велат од ЗНАМ.

И од Коалицијата Вреди ѝ порачаа на ДУИ дека нема потреба од автентично толкување на Рамковниот договор.
И опозицискиот СДСМ смета дека постизборните коалиции треба да се прават на база на усогласувањата на програмите и идеолопшката позиција на партиите, а не да се условуваат по принципот „победник со победник“ во законска регулатива.

– Секој глас на граѓаните е еднаков глас и оттука несоодветни би биле законски измени по етнички клуч. Право на секоја партија и политички субјект е да избере коалициски партнер, пред или по изборите – велат од СДСМ.

Од Левица сметаат дека по 20 години од Рамковниот договор, за целата јавност е јасно дека покрај тоа што се сегрегира општеството и се создаваат очајни услови за живот кои ги угнетуваат и бркаат подеднакво Македонците, Албанците и другите етнички заедници од државата, овој договор служи и како инструмент за бесконечно одржување на ДУИ на власт.

– Левица, за разлика од другите партии, поради овие причини повикува на итно носење на граѓански Устав кој ќе нè ослободи од спрегите на племенските поделби и тиранија – да се создадат вистински услови за квалитетен живот за граѓаните и здрава политичка средина, наместо дополнително да ја озаконуваме сопствената бинационализација и желбите за федерализација и сецесија на ДУИ. Вчера, во законодавниот дом, онаму каде што се изразува суверенитетот на народот, пратеник на ДУИ одби да даде изјава на македонски јазик. Јасно е дека ова е сега борба за унитарниот карактер на државата, а не за фиктивни концепти за легитимитет – вели Амар Мециновиќ, пратеник и портпарол на Левица.

Како што објавивме, Ахмети од собирот на ДУИ во Гостивар порача дека го ангажирал „авторот на Рамковниот договор“, Пол Вилијамс, да подготви платформа за легитимитетот. Според Ахмети, ВМРО-ДПМНЕ или не го прочитала или Рамковниот договор го чита по свое, затоа „авторот на договорот треба да подготви платформа за легитимитетот“.

ДУИ чека наредба од Ахмети за протести пред Собрание и пред Влада

Арбер Адеми од ДУИ дополни дека екипата работи на неколку предлог-идеи за да се оневозможи непочитување на волјата на гласачите во иднина и нарушување на духот на Охридскиот договор, истакнувајќи дека суштината на Охридскиот договор е да се спречи доминацијата на мнозинството (мајоризација) над втората по големина етничка заедница промовирајќи вистинска мултиетничка и консензуална демократија.