И Русија води пропагандна кампања за десничарската Алтернатива за Германија
При анализа на стотици пораки објавени на германски јазик на платформата Икс во текот на изминатиот месец биле препознаена „кампањата за дезинформирање преку двојници“, која Русија ја водела во 2022 година со цел да ја поткопа поддршката од Европа за Украина
Русија води кампања со дезинформации за да ги поткопа традиционалните политички партии во Германија и да придонесе за подобар резултат на екстремната десничарска Алтернатива за Германија на вонредните избори на 23 февруари, објави аналитичката организација Цемас.
Препорачано
Организацијата објави дека при анализа на стотици пораки објавени на германски јазик на платформата Икс во текот на изминатиот месец биле препознаена „кампањата за дезинформирање преку двојници“, која Русија ја водела во 2022 година со цел да ја поткопа поддршката од Европа за Украина. Шемата опфаќа споделување врски до фалсификувани западни медиуми што објавуваат дезинформации и лажни вести.
Москва упорно ги отфрла сите обвинувања дека на каков било начин води кампања за дезинформирање против западните земји.
При анализата на Цемас било забележано дека на платформата Икс зачестиле објавите во кои се обвинуваат Зелените за економската криза на Германија, во кои се критикува канцеларот во заминување Олаф Шолц поради поддршката за Украина и во кои се укажува дека не може да се има доверба во конзервативците. Од друга страна, имало повеќе објави во кои се фали АФД.
Дезинформациите биле поткрепени со врски до фалсификувани портали. Таквите објави биле прегледани повеќе од 2,8 милиони пати.
Конзервативниот блок партии, кој досега беше во опозиција, е на прагот да победи на вонредните избори во Германија, бидејќи анкетите укажуваат дека би освоил 29 отсто од гласовите. Екстремистичката АФД, пак, е на второто место со рејтинг од 21 отсто – двојно поголем од процентот на гласови освоен на изборите во 2021 година. Социјалдемократите на Шолц се на третото место со рејтинг од 16 отсто, а Зелените имаат рејтинг од 13 отсто. АФД не очекува покана за вклучување во владина коалиција, но настојува да освои доволно голем број пратеници за да блокира одлуки.
Екстремната партија неодамна доби поддршка и од американскиот милијардер Илон Маск, кој на сопствената платформата Икс, онаа што ја злоупотребуваат и руските пропагандисти, пренесуваше директно разговор со лидерката на АФД, Алис Видел.
