Веста за трагичниот пожар во дискотеката „Пулс“ во Кочани кој однесе 59 животи, како бомба одекна во светот и регионот.

Покрај македонските јавни личности, на социјалните мрежи се огласија и познатите регионални музички ѕвезди кои во шок и неверување изразија сочувство за загинатите.

Северина, која настапува низ Македонија, изрази сочувство до семејствата на загинатите.

„Драги мои пријатели од Македонија, има тага во моето срце и во овие болни моменти длабоко сочувствувам со сите семејства на загинатите и повредените жртви, како и со цела моја Македонија“, напиша пејачката.

Сочувство до семејствата на загинатите во страшната трагедија во Кочани им изрази и Нина Бадриќ, а исто така се огласи и Неда Украден.

Свои пораки со сочувство испратија и многу други изведувачи и јавни личности, меѓу кои Андреа Шушњара од „Елементал“, како и Здравко Чолиќ кој ги одложи закажаните настапи во Скопје.

Се огласи и Светлана Цеца Ражнатовиќ која е скршена од болка напиша: „О Боже, зошто? Мое искрено сочувство, Македонијо.“

На својот фејсбук-профил и Јелена Карлеуша упати порака: „Страшна трагедија ги снајде нашите браќа во Македонија. Нема утешни зборови за болката на родителите кои вечерва ги загубија децата. Македонија сега мора да биде силна. Нашето најдлабоко и најискрено сочувство до нашите браќа Македонци. Срцето ми е со вас, сочувствувам со вашата болка. Србија е со вас.“