Списокот на производи со гарантирана цена ќе се проширува, а на него влегуваат и безалкохолните, алкохолните пијалаци, пивото и газираните води, со исклучок на енергетски пијалаци, најави на прес-конференција премиерот Димитар Ковачевски.

Нивните цени ќе бидат намалени за 10 отсто, а референтен датум е 19 септември. Ќе следуваат и мерки за намалување на увозните давачки за свежиот зеленчук, оризот, агрумите (лимони, портокали и мандарини), како и намалување на царинските стапки за млечни производи со масленост над 10 проценти. Овие одлуки ќе бидат донесени и објавени во наредните денови и ќе бидат спроведени во практика, додаде Ковачевски.

– Донесовме и нова одлука за намалување на маржата за овошјето и за зеленчукот, па дополнително ќе се намали цената на овие производи до 30 отсто – рече Ковачевски. Тој објасни дека според најновата владина одлука, највисоката трговска маржа на големо ќе биде до 10, а на мало до 15 отсто. Гарантираната цена ќе важи до 30 ноември, а одлуката ќе стартува од среда откако ќе биде објавена во „Службен весник“.

Тој им порача на трговците дека работењето со дигиталните алатки им овозможува исто како што брзо реагираат кога се во прашање поскапувањата, така брзо да ги намалат цените. Премиерот повтори дека Владата ќе успее да ја стабилизира инфлацијата до крајот на годината.

– Со септемвриските покачувања од 10 отсто на платите, очекуваме двоцифрената инфлација да падне на 8 отсто, а на храната да падне до 5 отсто – рече Ковачевски и додаде дека се во постојан дијалог со сите засегнати субјекти.