Вчера неофицијално, а од денеска во 11 часот наутро, грчките власти бараат задолжителен ПЦР тест за превозниците. Веста за „Слободен печат“ ја потврди Биљана Муратовска од Макам-Транс, објаснувајќи дека пет километарската колона од камиони што ноќеска се создала на ГП Богородица, утрово била расчистена, а нашите камиони влегле на грчка територија.

За ПЦР тестовите плаќа грчката влада, но тоа предизвикува огромни колони пред границата, се чека со часови и ќе предизвика дополнителни трошоци за превозниците.

-Замислете илјада луѓе излезени од своите кабини како чекаат на ред за да им се земе брис? Проблемот е што не знаеме каде се сега камионите кои ноќеска влегле на грчка страна, оти требаше досега да бидат натоварени и да се враќаат назад во Македонија. Можеби се заглавени на меѓузоната – не знаеме, проверуваме – додава Муратовска.

Грчија најави воведување на нова мерка за заштита од коронавирусот за сите камиони кои влегуваат од балканските земји и во моментов трае жестока дипломатска битка против мерките на Грција.

-Нашите камиони секојдневно велгуваат и утвораат или истовараат стоки во пристаништето во Солун, затоа превозот на стока не смее да запре, бидејќи зависи целата економија и снабдувањето на населението – вели Муратовска.

Транспортните здруженија  се во постојана комуникацина со МНР и со кординативното тело за погранично управување, со притисок за да најдат решение.