Писмо, кое го прикажува австрискиот композитор Волфганг Амадеус Моцарт во „целосна паника“ поради неговиот љубовен живот, ќе биде претставено на аукција во аукциската куќа „Кристи“ во Лондон следниот месец, пишува „Ројтерс“.

Во писмото, кое композиторот го напишал во летото 1782 година, тој бара совет од близок пријател поради „недоразбирањето“ со неговата идна тешта.

„Таа ќе испрати полиција за да ја врати неговата свршеница со очигледно страшни последици за неговата репутација“, рече Томас Венинг од одделот за книги и ракописи на „Кристи“, зборувајќи за содржината на писмото.

„Тој е во целосна криза и ги искажува своите чувства на целосно нефилтриран начин“, додава Венинг.

Моцарт напишал многу писма за време на неговиот живот, но, како што вели Венинг, неговите писма ретко се наоѓаат на аукции и ретко имаме можност да направиме ваков „увид на неговиот карактер и чувства во прилично клучен момент од неговиот живот“.

Моцарт имал 26 години кога го напишал писмото, веднаш по пристигнувањето во Виена. Додека неговата кариера одела во нагорна линија, по успехот на неговата прва голема опера, неговиот љубовен живот „се искомплицирал“ во моментот кога Моцарт бил спремен да го оствари својот претстоен брак со Констанца Вебер.

„Тој потекнувал од многу строго католичко семејство. Па, фактот дека тој живеел со Констанца и дека веќе спиеле заедно, укажува на неговата слободна природа на однесување – во приватниот, но и во професионалниот живот“, изјави Венинг, кој тоа го опишува како „освежувачко“.

Венинг додава дека Моцарт бил своевидна револуционерна фигура и дека бил некој што не ги почитувал старите правила.

Волфганг Амадеус Моцарт и Констанца Вебер се венчале кратко по испраќањето на ова писмо, а биле заедно сè до неговата смрт во 1791 година, кога композиторот починал на 35-годишна возраст.

Писмото ќе биде претставено на исклучителната аукција на „Кристи“ во јули, а се очекува да достигне цена помеѓу 300.000 и 500.000 фунти.