На петтиот ден како е исчезнат неготинецот Миле Тодоров, потрагата по него станува се помасовна – денес веќе се трага и од воздух, вклучен е и хеликоптер, а утрово била извршена темелна потрага и во водите на реката Луда Мара, покрај која беше пронајден телефонот на 28-годишното момче.

Ова доаѓа откако членови на семејството на момчето на социјалните мрежи јавно апелираа да се засили потрагата по Миле.

Роднини на Тодоров за „Фокус“ велат дека потрагата станува поинтензивна и дека се вклучени голем број стручни екипи, но и доброволци. Кога утрово било проверено коритото на реката, и тоа од Марена, па долж течението до Сопот, и кога било утврдено дека тој дел е сосема чист, тие почувствувале олеснување, но сепак потрагата продолжувала на копно, сè додека Миле не биде пронајден.

-Веќе се вклучени голем број луѓе, и многу сме благодарни на сите за помошта. Се заблагодаруваме на СВР Велес, кои на располагање ги ставија сите свои ресурси, на полициските службеници од Неготино, од Кавадарци, на бројните граѓани кои доброволно дојдоа да помогнат, на навивачката група „Винари”. Му се заблагодаруваме и на неготинскиот градоначалник д-р Горан Стојанов, кој е постојано овде, вклучен во потрагата. Нам ни беше приоритет да се пребара речното корито, бидејќи реката на некои места има длабоки вирови, гранки, наместа, пак, е доста брза. За среќа, во водите на Луда Мара не се најде ништо и сега потрагата масовно продолжува на копно, во поширок размер. Ги замолуваме граѓаните да не шират шпекулации, читаме на социјални мрежи обвинувања и спомнување на политика, на партии, а тоа ни е најмалку потребно во моментот. На сите јавни служби, на сите волонтери кои се овде помеѓу нас, приоритет им е да се пронајде Миле, луѓето прават натчовечки напори и даваат се од себе“, велат од семејството на исчезнатото момче за „Фокус“.

Тие додаваат дека се исцрпени, но покажаната солидарност од граѓаните и службите им давала надеж да продолжат понатаму.

Исчезна 28-годишниот Миле Тодоров од Неготино