Јеменските бунтовници Хути денес ја презедоа одговорноста за потонувањето на грчкиот товарен брод „Етернити Ц“, кој пловел под знамето на Либерија, во Црвеното Море.

„Јеменската морнарица реагираше за да спаси неколку членови на екипажот на бродот, да им пружи медицинска помош и да ги транспортира на безбедна локација“, изјави портпаролот на војската на Хутите во телевизиско обраќање.

Ова е втор брод што Хутите го нападнаа овој месец, по неколкумесечно затишје, објави Ројтерс.

Четири лица беа убиени во нападот, шест беа спасени, а 15 се водат како исчезнати, соопштија извори од безбедносните компании кои учествуваа во операцијата за спасување.

Екипажот помина повеќе од 24 часа во вода пред да биде спасен.

Меѓу нив имаше 21 Филипинец, еден Русин и тројца вооружени чувари, вклучувајќи Грк и Индиец, од кои еден Индиец беше меѓу спасените.

Бродот Етернити Ц, кој беше под либериско знаме, беше нападнат во понеделник попладне од поморски беспилотни летала и ракетни гранати испукани од глисер.

Нападот ги уништи чамците за спасување, а бродот беше сериозно оштетен, нарушен и потона по вториот напад во вторникот.

Нападите врз бродовите во овој регион, според изворите, се поврзани со милициите Хути, кои рекоа дека ги нападнале бродовите во солидарност со Палестинците.

Нападите врз бродовите во Црвеното Море станаа почести од ноември 2023 година, кога Хутите почнаа да ги напаѓаат бродовите во стратешкиот поморски коридор.