Фудбалската федерација на Хрватска соопшти дека стадионот во Осиек за натпреварот од квалификациите за ЕП 2024 против Турција е распродаден за осум минути.

Хрватите на 12 октомври ќе ја пречекаат селекцијата на Турција, а овој меч е доста важен во трката за едно од местата кои водат на следното Европско првенство.

Моментно во квалификациската група „Д“ по 10 бодови имаат Хрватска и Турција, по седум Ерменија и Велс, а ниту еден репрезентацијата на Летонија.

Хрватската фудбалска федерација вели дека во периодот од 15:28 до 15:36 часот беа продадени 13.000 билети.

Пет отсто од капацитетот е резервиран за гостински навивачи од Турција. Инаку, Хрватската фудбалска федерација пушти во претпродажба 1.000 билети и тоа за најверните навивачи, односно оние кои гледале најмногу натпревари на репрезентацијата во претходните пет години.