Хрватска преку Програмата за помош за враќање на Хрвати во Босна и Херцеговина за 2025 година, нуди до 80.000 евра финансиска поддршка за проекти што го поддржуваат нивното враќање и престојот таму, пренесува Н1 телевизија. Вицепремиерот и министер за просторно планирање, градежништво и државен имот, Бранко Бачиќ, објави јавен повик за аплицирање од правни лица во Босна и Херцеговина кои спроведуваат вакви проекти.

Апликациите можат да ги поднесат регистрирани правни лица во Босна и Херцеговина кои работат на проекти насочени кон враќање, реинтеграција и престој на Хрвати во локалните заедници, со акцент на подобрување на квалитетот на живот и долгорочна одржливост. Програмата се спроведува преку неколку мерки. Првата е финансиска помош на здруженија и правни лица кои го поттикнуваат одржливото враќање на населението и создаваат подобри услови за живот и предуслови за престој.

Исто така, се охрабруваат економски активности и развој на центри за повратници, кои обезбедуваат помош и поддршка преку своите програми. Покрај тоа, планирана е реконструкција и изградба на комунална и социјална инфраструктура. Програмата вклучува и поддршка за институции за лица со посебни потреби и активности за социјално ранливи групи, како што се жртви на насилство и самохрани родители, како и подобрување на здравствената заштита.

Покрај сето тоа, се охрабрува креирањето програми насочени кон поттикнување на враќањето, сензибилизирање на јавноста за тешкотиите на повратниците и истакнување на успешните приказни на повратниците како мотивација. Вкупниот износ на финансиска поддршка по поединечен проект не смее да надмине 80.000 евра, а рокот за поднесување на апликациите е 4 август.