Хрватската контрола на летање објави оглас за 48 нови контролори на летање, нудејќи една од најплатените работни места во земјата. Од вкупниот број, 40 позиции се наменети за работа во Велика Горица во близина на Загреб, додека преостанатите осум ќе работат во Задар, Сплит и Дубровник. Кандидатите мора да исполнуваат неколку услови: завршено средно образование, помлади од 28 години во моментот на аплицирање, активно познавање на хрватски и англиски јазик, државјанство на Хрватска или некоја друга членка на Европската Унија и задоволителна медицинска способност.

Посебен акцент се става на здравствената категорија три, што подразбира отсуство на какви било абнормалности што би можеле да влијаат на безбедното извршување на работата. За избраните кандидати, работодавачот ќе ги сноси трошоците за лекарскиот преглед.
Процесот на селекција се состои од неколку рунди тестирање, вклучувајќи тест за интелигенција, прашалник за личност, тест за познавање на англиски јазик и тестот FEAST, кој симулира работни ситуации. Исто така, кандидатите ќе учествуваат во тимски вежби и интервју.

Оние што ќе бидат примени ќе поминат обука во Велика Горица- пишува Каматица. По успешното добивање на дозволата, работниот однос се претвора од договор на определено време во договор на неопределено време. Според порталот MojPosao, ова е шестата најплатена позиција во Хрватска, со просечна плата од 2.974 евра, додека горниот опсег достигнува дури 7.044 евра.