Продолжениот викенд, особено кога времето е убаво, е одлична можност за патување, а уште подобро ако пријатното може да се спои со корисното. Отприлика вака изгледа патувањето во Трст за многу Хрвати, пред сè оние од Истра. Тие можат да „летнат“ до Трст, кој отсекогаш беше популарна дестинација за евтино купување, за околу еден час. Таму го прават шопингот, а по пат пијат кафе и седнуваат на ручек. Патувањата во Трст се нешто поретки во последните десет години, но со растот на цените во Хрватска, ваквите патувања во соседна Италија се сè почести, рапортира Н1 Хрватска.

Разликите во цените сега се, всушност, повторно големи. По значително пониски цени можете да ги набавите речиси сите прехранбени производи, на пример ориз, тестенини, пасирани домати, разни пијалоци, бисквити, како и детергентите… Хрватите во своите автомобили ставаат неколку парчиња од сите производи кои можат да се чуваат подолго време. Се купува главно во продавниците кои се дел од трговските центри, како што се „Куп“ или „Фамила“, а уште поевтини може да се најдат производи од помалку познати брендови.

Покрај Истарци, во Трст може да се видат и жители од цела Хрватска, но и од Босна и Херцеговина. Еден корисник на ТикТок бил во супермаркет во Трст и решил да ги спореди цените со оние во Хрватска. Започнал со бисквити кои во Италија ги платил 2,29 евра (800 грама), додека во Хрватска чинат околу 3 евра за 350 грама. Кај соседите за слатки кроасани платиле 1,5 евро, а за истите во Хрватска би потрошиле 3,29 евра. Понатаму, мало чоколадо Линдт во Италија е околу 2 евра, а Милка 1,29 евра. Во Хрватска за чоколадо Линдт треба да потрошите од 2,50 до 4 евра, додека за Милка од 1,45 до 1,75 евра. Како што вели, омиленото песто го нашол на распродажба во Трст по цена од 1,79 евра, додека во Хрватска чини четири евра.