Директорот на Агенцијата за национална безбедност, Бојан Христовски синоќа на седница на Наставно – научниот совет избран е за асистент на научната област Криминалистички науки, потврдија од Факултетот за безбедност за „Слободен печат“.

-Ве известувам дека на седницата на Наставно научниот совет одржана во 19 часот, директорот на Агенцијата за национална безбедност м-р Бојан Христовски е избран во соработничко звање асистент на научната област Криминалистички науки, се вели во официјалниот одговор.

Седницата вчера беше закажана за во 12 часот, но членовите на Советот не усепаа да обезбедат кворум, па ја презакажаа за во 19 часот.

Со оглед на тоа што изборот во звање значи вработување на Факултетот, Христовски ако сака да биде асистент ќе треба да даде отказ од Агенцијата за национална безбедност. Според нашите информации, има законски рок до кога треба да се реализира вработувањето.

Владата го назначи Христовски за директор на АНБ на 16 октомври, а оттогаш не престануваат реакциите за неговото именување и дали тој ги исполнува условите да ја води АНБ. Најспорен беше неговиот ТОЕФЛ сертификат за англиски јазик издаден од јазичниот центар „Јулија“ од Пловдив за кој во јавноста беше откриено дека не постои и не се занимава со полагање. За ваков ист фалсификуван сертификат две директорки биле осудени на условни казни.

Од ДКСК за „Слободен печат“ откриваат дека кон првичната пријава доставени се уште седум пријави.

-Во однос на предметот за директорот на АНБ, Бојан Христовски кон првичната пријава доставени се уште седум пријави до Државната комисија за спречување на корупцијата. Доставени се барања за прибирање на потребната документација за утврдување на фактичката состојба, за што сè уште течат законските рокови за доставување на истата. По утврдување на фактичката состојба, ДКСК ќе донесе одлука на јавна седница и ќе ја објави на веб-страницата на ДКСК, велат од ДКСК за „Слободен печат“.

Чувари на безбедноста со оспорени биографии – ДКСК со месеци чека безбедносни сертификати да ги провери