Археолозите пронајдоа целосен гипсан крст стар 1.400 години за време на ископување во Абу Даби. Христијанскиот симбол конечно потврдува дека серија куќи откриени пред неколку децении биле дел од манастирски комплекс.

„Ова е многу возбудливо време за нас. Никогаш немавме конкретни докази дека куќите биле населени од христијани“, рече археологот Марија Гајевска од Одделот за култура и туризам – Абу Даби, пренесува „РТЦГ“.

Деветте мали куќи со дворови беа ископани во 1992 година на островот Сер Бани Јас, 170 километри југозападно од Абу Даби. Во близина, археолозите пронајдоа црква и манастир од 7-ми и 8-ми век, но не беше јасно дали куќите биле поврзани со манастирска населба.

Оваа година, археолозите се вратија во Сер Бани Јас за понатамошни ископувања. Во дворот на една куќа, тие пронајдоа гипсена плоча во форма на христијански крст, долга речиси 30 сантиметри.

„Со овој крст, сега докажавме дека овие куќи биле дел од христијанска населба“, рече Гајевска.

Според неа, куќите веројатно биле населени од постари монаси, кои се повлекувале во осаменост и се молеле, пред да се вратат во манастирот кај своите браќа.

Сер Бани Јас бил само едно од местата на христијанско богослужение во регионот во тој период, според преведеното соопштение од Канцеларијата за медиуми во Абу Даби. Христијанството се проширило низ Арапскиот Залив помеѓу 4-ти и 6-ти век, пред подемот на исламот во 7-ми век. Муслиманите и христијаните живееле на Сер Бани Јас сè додека манастирот не бил напуштен во 8-ми век.