Утре православните христијани ширум светот ќе го одбележат Велики петок, еден од најтешките денови во христијанството, денот кога Исус Христос бил осуден и распнат на крст, жртвувајќи се за сите луѓе и за спасението на светот.

Велики петок е најтажниот воедно и најважниот ден за христијаните. Ден на голема жалост, но и подготовка за Велигден, кој важи за најголемиот христијански празник. Велики петок е денот кога Исус Христос е осуден на смрт, на поттик на еврејските свештеници и фарисеи.

На велики петок православните верници строго постат, повеќето денот го поминуваат само со сув леб и вода.

Во знак на тага и жалост, црковните ѕвона не бијат на Велики петок.

Утринската молитва обично се служи во четвртокот вечерта. Главната особеност на таа служба се т.н. Дванаесет Евангелија  кои говорат за Христовите страдања.

Вечерната служба на Велики петок („Изнесување на Плаштаницата“) посветена е на погребението на Спасителот и обично се служи кон средината на денот. Во средината на Црквата се поставува возвишение – „гроб“, украсен со цвеќиња, а на Прсетолот се поставува Плаштаницата – големо платно, на кое е нацртан или извезен образот, односно ликот на Спасителот Исус Христос.

Песните на вечерната служба, се посветени на страдањата и смртта на Христа. По входот со Евангелието и пеењето на „Свете тихиј“ се читаат одломки од Книгите на Излез, Јов и 52-рата глава од Книгата на пророк Исаиј.

Што се однесува до обичаите околу храната на овој ден, уште одамна е востановен строг пост на вода, односно консумирање на храна која не се готви со масло. Поголемиот број христијани на денешен ден јадат варен зеленчук и овошје. Во некои манастири монасите не јадат ништо сè до заоѓањето на Сонцето, а до ова правило се придржуваат и некои верници.