Косовскиот премиер Авдула Хоти изјави дека ја прифаќа одлуката на Уставниот суд за прогласување за нелегитимна на Владата која тој ја води и за организирање на вонредни парламентарни избори, јави дописникот на МИА од Приштина.

Хоти на прес-конференција попладнево рече дека е „добро што Уставниот суд ја појасни ситуацијата” и нагласи дека актуелната Влада останува на должност до изборот на нова Влада.

– Ние ќе продолжиме со нашата работа и ќе ги исполниме обврски. Им гарантирам на граѓаните и на нашите партнери дека ќе работиме посветено, посебно во справувањето со ситуацијата со пандемијата на ковид-19, порача Хоти.

Уставниот суд на Косово синоќа го прифати барањето на опозициското Движење „Самоопределување“ за прогласување како неважечки на еден од гласовите на пратениците при изборот на актуелната влада. Со оглед дека без тој глас кабинетот на Хоти на 3 јуни не би обезбедил мнозинство од 61 пратеник во Собранието, Судот одлучи дека и тогаш изгласаната Влада нема легитимитет.

По оваа одлука, вршителката на должноста претседател на државата, Вјоса Османи, согласно Уставот, треба по консултации со партиите што ги започна денеска, да го одреди датумот на одржување на вонредните парламентарни избори.

Хоти на денешната прес-конференција побара Собранието да не се распушти пред да се изгласа буџетот на државата за 2021 година.

– Пред себе имаме значајни работи, како што е буџетот. Го повикувам Собранието да не се распушти без да се изгласа буџетот заз 2021 година. Дел од буџетот се заснова на меѓународни договори. Откако Собранието ќе го изгласа, ќе продолжиме со работа како привремена влада и ќе ја продолжиме реализацијата на програмата за економско закрепнување, односно на пакетот за јануари 2021 година, рече Хоти.

Отворен патот за вонредни избори на Косово: Уставниот суд вечерва ја урна владата на Авдула Хоти