Десниот бек на Пелистер, Усама Хосни со гол во последната секунда ги спаси зелено-белите од пораз во Автокоманда, во дуелот со Алкалоид (33-33).

Од првата минута па се до последната минута, избраниците на Кире Лазаров беа тие кои го диктираа темпото на игра. Уште по 5 минути игра, Алкалоид се одлепи на +2 а набргу и на +3 (7-4), а резултатот на полувремето гласеше 15-14 за тимот од Автокоманда.

Во второто полувреме, тимот на Кире Лазаров со агресивна одбрана и одлични интервенции на Галевски стигна до највисоки +4 (19-15), но Пелистер брзо се врати во игра преку Манасков и Хосни. Натпреварот продолжи во резултатски егал, пелистерци беа тие кои го бркаа резултатот и не им дозволија на младите полетни ракометари на Алкалоид резултатски да се одлепат.

Во финишот на натпреварот, при резултат 32-30, Алкалоид имаше напад за плус 3, но Митревски му фати удар на Серафимов. Словенецот Тајник погоди во мрежата на Галевски за минус еден 32-31. Лазаров побара тајмаут на 15 секунди до крај, даде инструкции како да се одигра последниот напад но сепак неговите играчи згрешија и му оставија на Пелистер неколку секунди, кои на крајот се испоставија за доволни. Гарабаја повика тајмаут, и својата доверба му ја довери на Усама Хосни кој со гол во последната секунда донесе радост на битолчани.

Преземено од: Спорт.ком.мк