Холандија го обнови прокетот за зајакнување на Судскиот совет, кој беше прекинат по незаконската смена на претседателката на Советот Весна Дамева во април минатата година, која пак, од декември по пресуда на Управниот суд повторно е на чело на оваа институција.

Амбасадорот на Холандија Дирк Јан Коп денеска на средба со Дамева ѝ го предал известувањето за обновениот проект „Зајакнување на ефикасноста, отчетноста и транспарентноста на Судскиот совет на Република Северна Македонија“, кој е финансиран од Владата на Холандија. Претседателката Дамева изразила искрена благодарност за заложбите на амбасадорот Коп и Владата на Кралството Холандија, кои во исклучително краток период го обновија овој клучен проект за Судскиот совет и воедно изразила благодарност и за дадената доверба и поддршка, информираа од Судскиот совет.

Во соопштението се наведува и дека амбасадорот Коп истакнал дека ќе продолжи блиската соработка на холандската амбасада со Судскиот совет и посакал успешна имплементација на проектните активности.

– Неговата екселенција амбасадорот Јан Коп изрази задоволство дека проектот, кој беше ставен во мирување во мај 2023 година, ќе продонесе кон имплементирањето на препораките на оценската мисија на ЕУ и зајакнувањето на владеењето на правото во земјата. Сускиот совет е посветен кон понатамошна соработка во рамките на ова обновено партнерство за унаоредување на судските процеси и обезбедување на правда за сите граѓани – се вели во соопштението од Судскиот совет.