Жените во Северна Кореја немаат пристап до современи хигиенски влошки и тампони, а мажите се соочуваат со забрана за кондоми. Според написот на The Star, лидерот на Северна Кореја Ким Џонг-ун вовел целосна забрана за сите видови контрацепција, при што медицински персонал кој ги нуди е казнет со присилна работа или затвор.

„Жените користат старомодни платнени влошки кои ги перат и ги користат повторно“, пишува во извештајот.

Забраната довела до сериозни здравствени ризици, како и до поткопување на личната автономија и достоинство, особено кај жените.

Покрај ова, властите воведоа строг кодекс на изглед – жените можат да изберат само од 18 типови фризури, а мажите од 15. Фармерки, пирсинг и креативни фризури се забранети како „симболи на американски империјализам“. Прекршителите се казнуваат со парични глоби, принудна работа или затвор.

На листата на забранети нешта се наоѓаат и кока-кола, производи на „Епл“, брза храна, како и религиозни текстови, вклучително и Библијата. И покрај тоа што Северна Кореја е секуларна држава, цитирање на Библијата или нејзино поседување може да резултира со јавна егзекуција.

Во еден случај, како што пренесуваат неименувани извори, маж бил егзекутиран затоа што упорно се обидувал да воспостави меѓународен телефонски повик, наведува медиимот.

Граѓаните имаат пристап само до три строго контролирани телевизиски канали, а интернетот и меѓународните повици се сметаат за кривично дело.