Во скопската населба Пинтија во општината Кисела Вода, попладнево се излеала „непозната црна течност“, соопшти МВР.

„Во СВР Скопје денеска околу 14 часот е пријавено дека на бул. „Борис Трајковски“ во близина на населба Пинтија истекува непозната црна течност од атмосферската канализација и таа се излева по булеварот. Сообраќајот се пренасочува и се преземаат мерки за утврдување на причините и расчистување на случајот“, соопштија од полицијата.

Според Град Скопје, од резервоар на објект на приватна компанија за производство на стиропор изграден во внатрешноста на населеното место, се излеале хемикалии користени во производствениот процес. На местото се противпожарни екипи кои се обидуваат да го изолираат инцидентот, а инспекторите од Град Скопје веќе изготвиле записник за хаваријата. Засега не се соопштува за каква истечена хемикалија се работи и колкава е опасноста за жителите на Пинтија.

Како што информира Град Скопје, за ваков тип хаварија, покрај паричната казна за сторителот од 45.000 евра, следи и затворање на погонот, како и налог за санирање на штетите предизвикани од инцидентот. Градот апелира Министерството за животна средина и просторно планирање (МЖСПП) и Општина Кисела Вода под чија надлежност е објектот да постапат согласно надлежностите.

-Со инспекциски извештај за извршен технички преглед на опрема под притисок каде со заклучок е нотирано дека на вентилот има знаци на протекување, правното лице „Екопор“ не преземало мерки да го спречи настанувањето на хаваријата на која сме сведоци денес. За овој објект кој е под надлежност на Општина Кисела Вода апелираме до Општината да постапи во рамки на своите надлежности, како и ресорното Министерство со цел санкционирање на правното лице кое ја предизвика хаваријата, наведува Град Скопје.