Годинашната евровизиска претставничка на Ирска, Бамби Таг, потврди дека има истрага за настаните за време на натпреварот.

За време на утринската програма „Ајрленд еј-ем“, таа откри дека била покрената истрага за дадените коментари од страна на израелската телевизија КАН за нејзиниот полуфинален настап. Пејачката смета дека таквите коментари ги прекршуваат правилата на натпреварувањето, пишува „Јуровикс“.

Истрагата вклучува и наводен притисок од израелската делегација за време на генералната проба за големото финале, кога Бамби Таг не можеше да учествува на парадата со знамиња. На денот на финалето, ирската делегација имаше средба со претставниците на Европскиот радиодифузен сојуз (ЕБУ), каде неколку национални телевизии се заканија дека ќе се повлечат.

За време на утринската програма, Бамби Таг изјави дека не може да зборува за тоа што се случило во Малме додека не заврши истрагата.

Да потсетиме, Бамби Таг ја претстави Ирска со песната „Doomsday Blue“ и го освои шестото место со 278 поени, што е најдобар резултат за Ирска во последните 24 години.