Откако во зимскиот преоден рок, капитенот Папу Гомез мораше да ја напушти Аталанта поради кавгата со тренерот Џанпјеро Гасперини, сега уште две ѕвезди на тимот од Бергамо најверојатно ќе ги следи неговите стапки.

Имено, Гасперини на првиот осминафинален натпревар во Лигата на шампионите против Реал Мадрид, во 56. минута го внесе во игра Јосип Иличиќ на местото на Муриел, за во 86. минута да го извади и да го замени со Малиновски. Словенечкиот репрезентативец збесна и демонстративно го напушти теренот притоа не се поздрави со соиграчите, по што започнаа шпекулациите во италијанските медиуми дека Иличиќ на лето ќе побара да биде продаден по секоја цена.
Исто така, медиумите пишуваат дека на лето највероатно ќе си замине и Дуван Запата за кого Јувентус подготви понуда тешка 60 милиони евра. На колумбискиот репрезентативец наводно му се допаѓа оваа идеја и наводно ќе инсистира управата да ја прифати и да му овозможи кариерата да ја продолжи во Јувентус.