Хамас денеска објави видео-снимка со еден од израелските заложници, киднапиран на 7 октомври 2023 година за време на нападот на ова палестинско исламистичко движење во Израел.

На снимката, која трае нешто повеќе од три минути, млад човек зборува на хебрејски и повикува на притисок врз израелската влада за да се обезбеди неговото ослободување.

Семејството на младиот Матан Зангакер, кој имал 24 години во моментот на нападот, ја одобрило објавата на видеото.

– Фактот дека Матан сѐ уште е жив не значи дека ќе ја преживее зимата или продолжувањето на воените притисоци. Единствениот начин Матан да се врати е со воспоставување прекин на огнот, изјави неговата мајка, Ајнав Зангакер, на собир во Тел Авив, обраќајќи се до премиерот на Израел, Бенјамин Нетанјаху.

За време на нападот на Хамас, 251 лице беа киднапирани на израелска територија. Во Газа останале 96 заложници, од кои 34 се прогласени за мртви од израелската армија.

Во израелски воздушен напад во Газа, според денешните палестински извештаи најмалку 21 лице загина а 30 се повредени.
Во нападот била погодена станбена зграда во бегалскиот камп Нусејрат, во централниот дел на Газа.