Хамас разгледува промена на пристапот во преговорите за прекин на огнот со Израел откако израелскиот напад во Катар беше насочен кон делегација на палестинската група, изјави висок функционер на Хамас, Сухаил ал-Хинди.

Во интервју за јапонската агенција Кјодо, тој изјави дека главниот преговарач на Хамас, Калил ел-Хаја, и други членови на политичкото раководство не биле повредени во нападот на 9 септември, но, според групата, пет члена на делегацијата биле убиени.

„Верувам дека нема пречки за продолжување на преговорите, но веројатно со нови механизми, методи и концепти што се разликуваат од претходните“, рече ел-Хинди во Доха.

Делегација на Хамас беше во Катар за да разговара за предлогот на САД за прекин на огнот кога, според групата, Израел изврши целна операција по наредба на израелскиот премиер Бенјамин Нетанјаху.

Државниот секретар на САД, Марко Рубио, вчера беше во Израел, каде што во разговорот со Нетанјаху ја нагласи важноста на разоружувањето на Хамас и ослободувањето на сите израелски заложници.
И покрај најновите настани, ел-Хинди рече дека Хамас нема целосно да ги запре преговорите, иако верува дека Израел „ги преминал сите црвени линии“.

Зборувајќи за идното управување со Газа, тој рече дека територијата треба да биде управувана од палестинскиот народ.

„Нашата цел не е да владееме со Газа“, рече тој.