Вознемирени граѓани пријавиле во повеќе банки дека забележале оти од нивните трансакциски сметки мистериозно исчезнале пари. Банките, како што дознава „Слободен печат“, исто така се вознемирени. И тие се во потрага по причината на овие случувања. Во меѓувреме, дел од граѓаните добиле известување да дојдат во банка за да им се смени картичката и да добијат нов пин.

Во нашата редакција се јавија повеќе наши сограѓани, а социјалните мрежи почнаа да се полнат со разни непосакувани случки. Банкарите уверуваат дека клиентите не остануваат оштетени и дека парите им се враќаат. Овие трансакции се оспоруваат кај провајдерите на картичките „Виза“ и „Мастеркард“ кои имаат соодветна процедура. Самата постапка за оспорување на трансакциите може да трае и до 90 дена, а по завршување на постапката, клиентот се информира за статусот на рекламацијата. Обично кражба на пари се случува кога се пазарува од проблематични сајтови со ниска заштита што се пробива, велат банкарите. Но, вистинско изненадување е што Комерцијална банка, во изјава за „Слободен печат“ вели дека има клиенти со злоупотребени картички, со „заеднички именител“ – „Лајкамобајл“, сериозен британски мобилен оператор, кој во земјава има околу 60.000 корисници.

– По добиени пријави од клиенти за злоупотребени картички, во согласност со редовните процедури на Комерцијална банка, направени се детални проверки и е констатирано дека сите злоупотребени картички имаат заедничко место каде што претходно биле користени, односно сите имале претходни плаќања на интернет кон „Лајкамобајл“. Со цел заштита на средствата на клиентите, Банката ги сведе на нула дневните лимити за интернет-трансакции на картичките кои претходно имале плаќања кон „Лајкамобајл“. Притоа, воопшто не беа засегнати лимитите за ПОС или АТМ, односно клиентите непречено можеа да извршуваат плаќања на ПОС-терминал и да подигнуваат готовина на банкомат. Сите засегнати клиентите беа упатени да направат бесплатна замена на картичката заради безбедносни причини, при што клиентите што не беа во можност да ја заменат својата картичка, а имаат потреба да ја користат за интернет-плаќања, беа информирани дека можат индивидуално да го зголемат лимитот за интернет-плаќања преку апликациите Интернет или мБанка, како и со јавување во Контакт центарот за картички, кој им е на располагање 24/7. Нагласуваме, картичките не се блокирани туку само времено беа оневозможени интернет-трансакции со нив, секако во насока на заштита на клиентите – велат од Комерцијална банка.

Сепак, корисниците велат дека тие останале и без картичките затоа што им било советувано да ги заменат со нови, а револтирани се зошто им е сугерирано да не плаќаат електронски сметки на „Лајкамобајл“.

– Точно е дека може да си повлечам пари од банка, но како долгогодишен корисник на платежна картичка и на електронско банкарство сметам дека сум оштетена. Откако ме повикаа од безбедносни причини да ја сменам картичката на трошок на банката, поднесов барање на 6 јуни, а добив известување дека картичката ќе ми биде готова на 20 јуни. Бев посоветувана и да не плаќам електронски кон „Лајкамобајл“. Но, таму е можно само електронско надополнување на сметка, што значи дека би требало да изберам друг оператор, што не ми одговара, затоа што ми одговараат овие цени – вели нашата соговорничка.

Од „Лајкамобајл“ велат дека се информирани од банката дека картички што се користени за плаќање, биле злоупотребувани.

– Техничките служби вршат проверка, ние немаме откриен некаков хакерски напад на „Лајкамобајл“. Ние водиме голема грижа за безбедноста на плаќањата – изјавија за „Слободен печат“ од „Лајкамобајл“.

На нивната официјална страница пишува: „Како компанија што нуди производи и услуги преку интернет, ја разбираме важноста за безбедноста. Поради таа причина, ние создадовме високобезбедносен систем за плаќање, за да ви осигуриме сигурност при вршењето на вашите онлајн плаќања и кога ни ги доставувате вашите лични податоци. Безбедноста и заштитата од измами се многу важни за нас и се следат во сите делови на нашата веб-страница, каде што е применливо. Ние ја користиме технологијата ‘Secure Sockets Layer (SSL)’ за да ги енкриптираме вашите детали кога тие се пратени од вашиот компјутер до нашиот систем. ‘Лајкамобајл’ учествува во ‘Verified by Visa’ и ‘MasterCard SecureCode’ програмите, наменети за безбедност при онлајн купување“.