Хаг го отфрли барањето на Младиќ за ослободување поради здравствената состојба
Хашкиот механизам за меѓународни кривични трибунали го отфрли барањето на Ратко Младиќ за предвремено или привремено ослободување од хуманитарни причини, јавува Н1 телевизија.
Препорачано
Одлуката ја донесе судијката Грасиела Гати Сантана, по консултација со петте судии кои претходно одлучуваа по жалбата на Младиќ на конечната пресуда.
Одбраната на Младиќ тврдеше дека тој страда од терминална болест и дека неговиот животен век е драстично скратен, истакнувајќи дека условите на притвор го отежнуваат обезбедувањето соодветна нега. Сепак, судот утврди дека, иако неговата здравствена состојба е сериозна и бара секојдневна нега, не постои акутна терминална болест што би го оправдала неговото ослободување.
Според медицинските извештаи, Младиќ е во стабилна состојба со повремени подобрувања, а во затворската болница во Хаг има пристап до високо специјализирана нега, вклучително и мултидисциплинарен тим и можност за редовен контакт со неговото семејство.
Судот оцени дека неговиот понатамошен притвор не е нехуман или понижувачки, туку дека ги исполнува високите стандарди за хуман третман на осудените лица.
Како што е наведено, судот ќе продолжи да ја следи неговата здравствена состојба и да обезбеди соодветна нега и услови за одржување контакт со неговото семејство.
