Фудбалерите на Манчестер сити накратко ги прекинаа мислите за резултатска криза со пласманот во четвртфиналето на ФА Купот, но саботниот натпревар против Плимут ќе остане запаметен и по повредата на Нејтан Аке, кој очигледно нема да се врати на теренот уште долго.

Холандскиот дефанзивец беше заменет на стартот од вториот дел, правејќи место за Рубен Дијаз, а самиот Пеп Гвардиола по натпреварот потврди дека загриженоста за неговата состојба не е неоснована. И покрај тоа што природата на повредата не е разјаснета, сега е извесно дека долгогодишниот премиерлигаш нема да биде подготвен за натпреварите со Холандија и Шпанија кон крајот на овој месец во Лигата на нации.

Еден од постандардните првотимци на Сити оваа деценија одигра само 10 првенствени натпревари оваа сезона, па јасно е дека нема да се приближи до бројот на натпревари што ги одигра во последните две години. Аке на тој начин им се приклучува на повредените Мануел Аканџи и Џон Стоунс, што секако ќе влијае на реконструкција на одбраната на „граѓаните“.

Тоа би можело да значи дека Гвардиола до крајот на сезоната ќе игра со нов одбранбен тандем, кој би можел да биде столб на борбената одбрана на англискиот шампион во наредниот период. Станува збор за Витор Рејс (19) и Абдукодир Хусанов (21), за кои Гвардиола по мечот зборуваше со пофални зборови.

– Исклучително сум благодарен што ги имам. Без нивна помош немаше да имаме шанси да се пласираме во Лигата на шампионите или да бидеме конкурентни во трката за ФА Купот. Ќе го имавме само Рубен и тоа ќе беше крајот на приказната. Чудо е што тие се тука – рече тој на прес-конференцијата по пласманот во четвртфиналето на купот.