За да ја задоволи огромната потреба од енергија за центрите за вештачка интелигенција, „Гугл“ ќе употребува мали нуклеарни реактори.

Информатичкиот гигант потпиша договор со „Каирос пауер“ за конструкција и поврзување на еден нуклеарен реактор до крајот на оваа деценија, а потоа и во други центри до 2035 година. Сѐ уште не се објавени деталите колку ќе чинат реакторите и каде ќе се градат.

– На енергетската мрежа ѝ се потребни нови извори за да ги задоволи потребите на технологијата за вештачка интелигенција. Овој договор ни помага да ја забрзаме новата технологија што би обезбедила доволно чиста енергија што би го ослободила целосниот потенцијал на вештачката интелигенција за сите – изјави Мајкл Терел, директор на одделението за енергија и клима при „Гугл“.

Договорот е историски и за развојот и примената на технологијата за мали нуклеарни генератори на струја.

– Договорот со „Гугл“ е важен за да се забрза комерцијализацијата на напредна нуклеарна енергија, преку демонстрирање на техничката и пазарната применливост на решение што е критично за декарбонизација на енергетските мрежи – изјави директорот на „Каирос пауер“, Џеф Олсон.

Пред да почне да се реализира проектот, плановите мора да бидат разгледани и одобрени од Нуклеарната регулаторна комисија на САД, како и од локалните агенции во местото во кое ќе се градат реакторите. „Каирос пауер“ лани од регулаторите ја доби првата лиценца, со важност од половина век, за изградба на нов тип нуклеарни реактори, а во јули ја почна изградбата на демонстрациски реактор во Тенеси.

Чисти извори на струја

Малите реактори со нова технологија важат за многу побезбедни и почисти во споредба со традиционалните, но имаат помала моќност и би се користеле за генерирање струја за индустриски капацитети или градови.

Глобалната потреба за енергија постојано се зголемува, а економиите во исто време настојуваат да ги исфрлат од употреба фосилните горива, за да се ограничи штетата од глобалното затоплување. Нуклеарните реактори се идеално решение за овие проблеми, зашто генерираат многу струја, без да испуштаат јаглеродни гасови во атмосферата. Голем предизвик, од друга страна, е чувањето на нуклеарното гориво и спречувањето хаварии.

На Конференцијата на Обединетите нации за климатски промени лани САД објавија дека имаат план тројно да го зголемат капацитетот за генерирање струја од нуклеарни извори до средината на овој век, што би овозможило целосно напуштање на фосилните горива.

Аналитичарите на „Голдман Сахс“ предвидуваат дека веќе до крајот на деценијата двојно ќе се зголеми потрошувачката на струја од дигиталните центри за чување и обработка на податоци, на кои им е потребно огромни количество енергија за пресметковните операции, но и за разладување.

„Мајкрософт“ во Три Мајл Ајленд

За таа цел „Мајкрософт“ во септември потпиша договор за 20-годишно користење на производствениот погон на нуклеарната енергетска централа на Три Мајл Ајленд, која по хаваријата во 1979 година е обновена и повторно ќе биде оперативна од 2028 година.

– Договорот е моќен симбол на преродбата на нуклеарната технологија како чист и доверлив извор на енергија – изјави директорот на „Констелејшн енерџи“, сопственикот на централата.

Три Мајл Ајленд во 1979 година беше сцена на најголемата нуклеарна закана во САД, но инцидентот помина без жртви и озрачени луѓе. На 28 март поради механички дефект и човечка грешка делумно се стопи реакторот 2 во централата. Реакторот 1 продолжи да генерира струја сѐ до 2019 година, кога централата беше затворена поради „непрофитабилност“.

Новите сопственици објавија дека во обновата на целата централа ќе вложат повеќе од 1,6 милијарда долари, со очекување дека таа ќе биде оперативна барем до 2054 година и дека ќе обезбеди 3.400 директни и индиректни работни места.

Во договор со „Мајкрософт“ повторно ќе биде вклучен реакторот 1, кој ќе генерира повеќе од 800 мегавати.

„Амазон“ во Пенсилванија

„Амазон“, пак, уште во март објави дека од компанијата „Тален енерџи“ за 650 милиони долари купил центар за податоци со нуклеарен извор на енергија од 960 мегавати.

– Пред неколку години „Амазон“ си постави амбициозна цел до 2040 година повеќе да не емитува јаглеродни гасови во атмосферата. Тоа е десет години порано од целите на Парискиот климатски договор. За таа цел ние сме на пат до 2025 година да обезбедиме обновлива енергија за нашите операции. Како додаток на проектите за генерирање енергија од ветер и од сонце, кои зависат од временските услови, истражуваме нови иновации и технологии. Во таа насока е и договорот со „Тален енерџи“ – објави претставник на „Амазон“.