Концерниот простор во Музејот на македонската борба на 5 април, со почеток во 20 часот, ќе го исполнат звуците на гудачкиот квартет „Атака“, кои ќе исполнат репертоар на македонски дела од автори – претставници на неколку творечки генерации.

На програмата се делата „Распеви“ на тема од Јован Кукузел од Гоце Коларовски, „Сокол ли сум, бура, или бескрајна песна“ на Јана Андреевска и „Капричо“ од Драган Шуплевски, а своја примиера оваа фестивалска вечер ќе доживее делото „The triune hypotheses“ од Ангел Спироски.

Гудачкиот квартет „Атака“ настапува во состав Ева Богоевска – виолина, Марија Трајковска – виолина, Илза Бафтиари – виола и Маја Михајловска – виолончело.

Сите четири изведувачки своето образование го оформиле на Факултетот за музички уметности во Скопје, а секоја од нив има и доусовршување на познати светски конзерваториуми за музика. Станува збор за врвни изведувачки кои се дел од музичкиот живот кај нас.

Концертот се одржува во рамките на 45. Денови на македонска музика (ДММ), а влезот е слободен.