Поранешниот премиер Никола Груевски, кој избега во Унгарија соочен со санкции за злоупотреби извршени додека беше на функцијата, денеска преку социјалните мрежи им го честиташе празникот Свети Никола на верниците во, како што вели, „православна Македонија“.

„Денес во православна Македонија се слави денот на Свети Никола – заштитникот на децата, сиромашните, морепловците, рибарите, патниците, затворениците и симболот на дарежливоста“, напиша тој.

„Овој празник отсекогаш бил симбол на нашето единство, традиција и непоколеблива вера во подобро утре. Денес, иако сум далеку од Македонија, мојата мисла и срце се со вас. Иако физички оддалечен, мојот дух е неразделно поврзан со секое македонско огниште. Ги гледам нашите цркви како светат, ги слушам камбаните како ѕвонат, ја чувствувам радоста во домовите каде што се слави“, додава Груевски во носталгичната објава на неговиот именден.

Во друго обраќање вечерта, тој им се заблагодари на сите кои му го честитале именденот, не пропуштајќи да го искористи поводот за да направи смела паралела со своето владеење во Македонија:

„Свети Никола не е само светец – тој е симбол на несебичноста и храброста да се застане зад своите убедувања. Истите вредности што нѐ водеа кога заедно ја издигнавме Македонија, градејќи патишта, болници, училишта – споменици на нашата решителност“, порача од Будимпешта Груевски.