Министерот за дигитална трансформација Стефан Андоновски вечерва во гостување на ТВ21 го коментираше случајот со поранешниот вицепремиер Артан Груби, кој не е во земјава, и не е достапен за органите на прогонот.

„Можеби Груби ќе се врати и ќе докаже дека нема никаква вмешаност во малверзациите во „Лотарија“. Неговото бегство го покажува неговиот кукавичлук“, рече Андоновски.

„За мене е поразително тоа што се случи, што се дозволи од страна на некои полициски службеници тој да побегне. Се истражува, знам, дали било намерно или ненамерно, но тоа навистина е штета. Тоа го покажува кукавичлукот на човекот кој го користеше Министерството за политички систем за играње фудбалчиња, за вработување на 500-600 луѓе кои воопшто не одеа на работа, за ќебапчиња од 20-30 илјади евра, за расходување на автомобили… Ние сме во моментов во таа зграда и можам да забележам дека тоа било користено како личен вилает на Артан Груби, а не како институција на државата Македонија“, рече министерот.