Северна Македонија не е имуна на феноменот со перење пари чија проценета вредност во светот според статистичките податоци е од два до пет отсто од светскиот БДП, иако минатата година е забележано значително подобрување во процесирањето на случаите за перење пари, оценува вицепремиерката за политики на добро владеење, Славица Грковска.

Во обраќањето на завршната конференција на Хоризонталната програма за Западен Балкан и Турција на Европската Унија и Советот на Европа што се одржува во Будва, Црна Гора, Грковска кажа дека лани биле поднесени вкупно 12 кривични пријави против 61 лице, 5 обвиненија против 15 лица, 7 пресуди за 16 лица и 2 правосилни пресуди за 2 лица.

– Овие подобрувања се резултат на работата на националните власти и нивната посветеност, но треба да се оддаде признание и за работата на Акцијата против економскиот криминал во изминатите шест години – изјави Грковска.

Усвојувањето на Закон за борба против перење пари и финансирање тероризам, чија имплементација веќе започна и кој е усогласен со најновите меѓународни стандарди и директиви на Европската Унија, како и подготовката на новиот Кривичен законик кој е во завршна фаза, се клучни за подобрување на системските мерки во борбата против организираниот криминал и тероризмот.

Заедничката работа преку проектот „ Акција против економскиот криминал“, што се спроведува во рамките на Хоризонталниот инструмент за Западен Балкан и Турција, како што кажа, овозможува низа активности, како што се Националната проценка на ризик од перење пари и финансирање на ризици од тероризам, како и изготвување Национална стратегија за борба против перење пари и финансирање на тероризмот.

Она што произлезе од заедничката соработка, а што е многу значајно, е подготовката на законското решение за потекло на имот.

– Ова законско решение кога ќе се донесе ќе биде од големо значење за идентификување и одземање на имот за кој не може да се утврди потеклото и значително ќе придонесе во борбата против корупцијата и сите видови економски криминал. Очекуваме поддршката од Советот на Европа и Европската Унија да продолжи во оваа активност, со цел успешна имплементација на овој закон – изјави Грковска.